कालो मरिच मुटु रोग, मधुमेह र क्यान्सर जस्ता रोगहरूको लागि फाइदाजनक

मंसिर ७ । स्वास्थ्यका लागि उपयोगी मानिने कालो मरिच विभिन्न रोग न्यूनीकरणमा प्रभावकारी देखिएको छ। “मसलाको राजा”का रूपमा चिनिने कालो मरिच आयुर्वेदमा हजारौं वर्षदेखि औषधि रूपमा प्रयोग हुँदै आएको छ, र हालै यसको फाइदासम्बन्धी वैज्ञानिक प्रमाणहरू पनि सार्वजनिक भएका छन्।
विशेषगरी पाचन प्रणाली सुदृढ बनाउने, रोग प्रतिरोधात्मक क्षमता बढाउने, छाला–कपालको स्वास्थ्य सुधार गर्ने, तथा निद्राको गुणस्तर उकास्ने जस्ता धेरै लाभ कालो मरिचसँग जोडिएका छन्। आयुर्वेदका अनुसार यसले पाचन प्रक्रियालाई तीव्र बनाउँदै अपच, ग्यास तथा पेटसम्बन्धी समस्या कम गर्छ। चिसो, खोकी र फ्लूका लक्षणमा समेत यसको प्रभावकारी भूमिका रहेको विशेषज्ञहरू बताउँछन्।

कालो मरिचमा पाइने एन्टिअक्सिडेन्ट गुणले शरीरमा रहेका फ्री रेडिकलहरूसँग लड्न मद्दत गर्ने भएकाले बुढ्यौली ढिलो गराउने तथा सूजन नियन्त्रणमा सहायक हुने उल्लेख गरिएको छ। यस्तै, यसको नियमित सेवनले गठिया, मुटु रोग, मधुमेह र क्यान्सरजस्ता दीर्घकालीन रोगहरूको जोखिम कम हुन सक्ने अनुसन्धानले संकेत गरेका छन्।

तौल घटाउन तथा मेटाबोलिज्म सुधार गर्न कालो मरिच उपयोगी मानिन्छ। शरीरको बोसो जलाउने प्रक्रियालाई तीव्र बनाउनुका साथै यसले रगतमा चिनीको मात्रा सन्तुलनमा राख्न मद्दत गर्ने भएकाले मधुमेहका बिरामीका लागि लाभदायक हुनसक्छ। दम, ब्रोन्काइटिस तथा श्वासप्रश्वाससम्बन्धी अन्य समस्यामा पनि यसको सेवन प्रभावकारी देखिएको छ।
मस्तिष्क स्वास्थ्यका लागि कालो मरिचमा रहेको पाइपरिन नामक यौगिक लाभदायक मानिन्छ। यसले स्मरणशक्ति वृद्धि गर्ने तथा अल्जाइमर–पार्किन्सनजस्ता रोगको जोखिम घटाउने सम्भावना रहेको अध्ययनहरूले देखाएका छन्।
भिटामिन र खनिजले भरिपूर्ण कालो मरिचले शरीरलाई समग्र रूपमा सुदृढ बनाउने भएकाले विशेषज्ञहरू यसको सन्तुलित सेवनको सिफारिस गर्छन्। तर औषधीय रूपमा उपयोग गर्नुअघि चिकित्सकसँग परामर्श लिनु उचित हुने स्वास्थ्यकर्मीहरूको सुझाव छ।