जुम्लामा आठ सय ४९ मतदाता थपिए

जुम्ला। जुम्लामा आगामी फागुन २१ गते हुने प्रतिनिधिसभा सदस्य निर्वाचनका लागि ८४९ नयाँ मतदाता थपिएका छन्। जिल्ला निर्वाचन कार्यालय जुम्लाका निमित्त कार्यालय प्रमुख नारायणी आचार्यका अनुसार नयाँ दर्ता भएका मध्ये करिब ५० प्रतिशत युवा छन्।

अनलाइन मार्फत दर्ता गर्न मिल्ने सुविधा सुरू भएपछि बिहीबारसम्म कुल ८४९ नयाँ मतदाता सूचीकृत भएका हुन्। तीमध्ये ३७३ महिला र ४७६ पुरुष रहेका छन्। बाहिरी जिल्लाबाट समेत ९७ जनाले जुम्लामै नयाँ मतदाताका रूपमा आफ्नो नाम दर्ता गरेका छन्।

नयाँ दर्ता हुनुअघि जिल्लामा ६७ हजार ७३६ मतदाता रहेका थिए। त्यसमा पुरुष ३५ हजार २७५ र महिला ३२ हजार ४६१ थिए।

यसैबीच हिमा गाउँपालिका–१ र पातारासी गाउँपालिका–७ मा एक–एक मतदान केन्द्र थप्न तथा तिला गाउँपालिका–९ मा रहेको एक मतदान केन्द्र स्थानान्तरण गर्नका लागि जिल्ला निर्वाचन कार्यालयले केन्द्रीय निर्वाचन आयोगमा सिफारिस गरेको छ।

एक नगरपालिकासहित सात गाउँपालिका गरी आठ स्थानीय तह रहको जुम्लामा स्थानीय तहको निर्वाचनका लागि ७९ मतदान स्थल र १०२ मतदान केन्द्र कायम गरिएको थियो। निर्वाचन कार्यालयले असोजदेखि मतदाता नामावली सङ्कलन थालेको हो।

कात्तिक मसान्तसम्मको प्रारम्भिक म्याद कायम रहे पनि दर्ता तथा अद्यावधिकमा देखिएको उल्लेख्य सहभागितालाई मध्यनजर गर्दै आयोगले म्याद आजसम्मका लागि थप गरेको कार्यालयले जनाएको छ।