सर्लाहीमा स्रोत नखुलेको नगदसहित तीन जना पक्राउ

सर्लाही। स्रोत नखुलेको ठूलो परिमाणको नगद रकमसहित तीन जना व्यक्ति पक्राउ परेका छन्। मलंगवा नगरपालिका–८ बाट प्रहरीले ८ लाख १३ हजार ९ सय १० रुपैयाँ बरामद गर्दै उनीहरूलाई नियन्त्रणमा लिएको हो।

पक्राउ पर्नेहरूमा ईश्वरपुर नगरपालिका–३ निवासी ३४ वर्षीय सुवाश लामिछाने, २९ वर्षीय रूपेश सहनी तथा कविलासी नगरपालिका–४ निवासी २८ वर्षीय मुकेश चौधरी रहेका प्रहरी कार्यालयले जनाएको छ।

प्रहरी चौकी गोरखकालीबाट खटिएको टोलीले भारतको सोनबर्षाबाट मलंगवातर्फ आउँदै गरेको म.प्र.०३–०३६ प ९३८८ नम्बरको मोटरसाइकलमा सवार सुवाश र रूपेशलाई, साथै पैदल यात्रु मुकेशलाई चेकजाँचका क्रममा उक्त नगदसहित पक्राउ गरेको हो।

बरामद रकमको स्रोतबारे थप अनुसन्धान भइरहेको प्रहरीले जनाएको छ।