पर्वतमा कुटपिट गरी श्रीमतीको हत्या, श्रीमान् पक्राउ

पर्वत । पर्वत जिल्लामा कुटपिट गरेर श्रीमतीको हत्या गरेको आरोपमा एक पुरुष पक्राउ परेका छन्।

प्रहरीका अनुसार, पक्राउ परेका व्यक्ति पर्वतको मोदी गाउँपालिका–६ दराक निवासी ५१ वर्षीय जितबहादुर विक हुन्। उनले आफ्नी ५२ वर्षीया श्रीमती सिता विकलाई कुटपिट गरी गम्भीर घाइते बनाएका थिए।

घटनाबारे जानकारी पाएपछि प्रहरी चौकी देउपुर डिमुवाबाट खटिएको टोलीले जितबहादुरलाई घटनास्थलमै नियन्त्रणमा लिएको हो।

गम्भीर घाइते भएकी सिता विकलाई उपचारका लागि प्रदेश अस्पताल, कुस्मा लगिएको थियो। तर उपचारकै क्रममा उनको मृत्यु भएको प्रहरीले जनाएको छ।

प्रहरीका अनुसार, घटना सम्बन्धमा थप अनुसन्धान भइरहेको छ।