कर्णाली मन्त्रिपरिषद्को निर्णय : सचिव सरुवा अधिकार मुख्यमन्त्रीलाई, कृषि कार्यक्रम स्वीकृत 

सुर्खेत । कर्णाली प्रदेश सरकारले बुधबार बसेको मन्त्रिपरिषद् बैठकबाट तीनवटा महत्वपूर्ण निर्णय गरेको छ। बैठकले प्रदेश सचिवहरूको पदस्थापन र सरुवासम्बन्धी अधिकार मुख्यमन्त्रीलाई प्रत्यायोजन गर्ने निर्णय गरेको हो। अब प्रदेशमा खटिएका सचिवहरूलाई आवश्यकता अनुसार विभिन्न मन्त्रालयमा पदस्थापन गर्ने र त्यसको जानकारी राजपत्रमा प्रकाशित गर्ने अधिकार मुख्यमन्त्रीलाई दिइनेछ।

त्यसैगरी, बैठकले कृषि क्षेत्रको विकासलाई लक्षित गर्दै सञ्चालन हुने ‘उच्च मूल्य कृषि वस्तु उत्थानशील कार्यक्रम’ को अस्थायी सांगठनिक संरचना स्वीकृत गरेको छ। नेपाल सरकार, प्रदेश सरकार, स्थानीय तह, अन्तर्राष्ट्रिय कृषि विकास कोष (IFAD) र एशियाली विकास बैंक (ADB) को सहकार्यमा सञ्चालन हुने यस कार्यक्रमअन्तर्गत सुर्खेतमा मुख्य कार्यालय तथा जाजरकोट र जुम्लामा ‘करिडोर कार्यक्रम’ स्थापना गरिनेछ। यसका लागि आवश्यक अस्थायी दरबन्दी समेत पारित गरिएको प्रवक्ता विनोद कुमार शाहले जानकारी दिए।

साथै, मन्त्रिपरिषद् बैठकले कर्णाली प्रदेश अस्पतालको निर्देशकमा डा. गणेश थापालाई नियुक्त गर्ने निर्णय गरेको छ। उनी यसअघि सोही पदमा निमित्त निर्देशकका रुपमा कार्यरत रहेका थिए।