युएई सरकारद्वारा १२० नेपालीलाई आममाफी

  संयुक्त अरब इमिरेट्स (युएई) सरकारले विभिन्न अपराधमा जेल सजाय भोगिरहेका १२० नेपालीलाई आममाफी दिएको छ।

अबुधावीस्थित नेपाली राजदूतावासका अनुसार ती नेपालीहरूको बाँकी कैद सजाय माफ गरिएको हो। इस्लाम धर्मावलम्बीहरूको महान पर्व अल अहाद को अवसरमा युएई सरकारले विशेष निर्णय गर्दै आममाफी प्रदान गरेको दूतावासले जनाएको छ।

यस निर्णयले लामो समयदेखि जेलमा रहेका नेपालीहरूलाई स्वदेश फर्कने मार्ग खुलेको दूतावासले जनाएको छ। आममाफी पाउने नेपालीहरूको विवरण संकलन तथा आवश्यक प्रक्रिया पूरा गर्ने कार्य दूतावासमार्फत अगाडि बढाइनेछ।