गाउँको बाँझो खेतबारी उर्वर बनाउन ठोस नीति ल्याउनुपर्ने: तिमिल्सेना

 राष्ट्रिय सभाका पूर्वअध्यक्ष गणेश तिमिल्सेनाले गाउँमा बाँझो खेतबारीलाई उत्पादनशील बनाउन सरकारसँग ठोस नीति ल्याउन आग्रह गरेका छन् । आइतबार काठमाडौँमा आयोजित कार्यक्रममा उनले समस्या मात्रै औँल्याउने होइन, समाधानका उपायहरू पनि पेश गर्न विज्ञहरूलाई आग्रह गरे । खेतबारी बाँझो छ, विद्यालयमा विद्यार्थी छैनन् भन्ने सबैलाई थाहा छ, तर समाधानका लागि के गर्ने भन्ने ठोस योजना आउनुपर्छ,  तिमिल्सेनाले भने । स्थानीय सरकारले दिशानिर्देश पाएमा आगामी योजनामा प्रभावकारी रूपमा लागू गर्न सक्छ ।

उनका अनुसार गाउँमा सडक, बिजुली, खानेपानी जस्ता सुविधा पुगे पनि उपभोग गर्ने जनसंख्या शहर र विदेशतिर केन्द्रित भएको छ। विकास गाउँमा पुगेको छ, तर मान्छेहरू सहरतिर गएका छन् । यसले विकासको प्रतिफल घटाएको छ, उनले बताए । तिमिल्सेनाले संघ, प्रदेश र स्थानीय तह सबैले मिलेर गाउँमै रोजगारी र सुविधा उपयोग गर्ने वातावरण बनाउनुपर्नेमा जोड दिए।