आजकाे माैसम : देशभर बदली र वर्षाको सम्भावना 

साउन २१  — देशभर मनसुनी वायु सक्रिय रहँदा अधिकांश स्थानमा मौसम बदली भई वर्षा भइरहेको छ। मौसम पूर्वानुमान महाशाखाका अनुसार मनसुनको न्यून चापीय रेखा नेपालको तराई भूभागमा अवस्थित रहेकाले आगामी २४ घण्टासम्म देशका धेरै स्थानमा मध्यम तथा केही स्थानमा भारी वर्षा हुने सम्भावना छ।

महाशाखाले बुलेटिनमा विशेष गरी कोशी र सुदूरपश्चिम प्रदेशका एक-दुई स्थानमा भारी वर्षा हुनसक्ने जनाएको छ। हाल कर्णाली र सुदूरपश्चिम प्रदेशसहित देशका पहाडी भूभागमा पूर्ण बदली देखिएको छ भने मधेसलगायतका विभिन्न भागहरूमा हल्कादेखि मध्यम वर्षा भइरहेको छ।

दिउँसो लुम्बिनी, कर्णाली, सुदूरपश्चिम र कोशी प्रदेशका पहाडी क्षेत्रमा मध्यम वर्षाको सम्भावना रहेको छ। अन्य क्षेत्रमा पनि छिटफुट वर्षा हुन सक्ने देखिएको छ। यस्तै, राति देशभर सामान्यदेखि पूर्ण बदलीको अवस्था रहनेछ। कोशी र मधेस प्रदेशका केही ठाउँमा, साथै बागमती, गण्डकी र सुदूरपश्चिम प्रदेशका केही भागमा पनि मध्यम वर्षाको सम्भावना छ।

महाशाखाले भारी वर्षाका कारण नदी तथा खोलामा पानीको बहाव बढ्न सक्ने, पहिरो र भूक्षयको जोखिम देखिन सक्ने तथा सडक र हवाई यातायात प्रभावित हुनसक्ने भन्दै सतर्कता अपनाउन सबैलाई अनुरोध गरेको छ। विशेषगरी कोशी र सुदूरपश्चिम प्रदेशका बासिन्दालाई चनाखो रहन सुझाव दिइएको छ।