सुर्खेतबाट ३.७ ग्राम ब्राउनसुगरसहित ३ जना पक्राउ

सुर्खेत ।  सुर्खेत प्रहरीले वीरेन्द्रनगरबाट लागुऔषध ब्राउनसुगरसहित तीन जनालाई पक्राउ गरेको छ। वीरेन्द्रनगर नगरपालिका-९, लाटीकोईलीबाट सोमबार साँझ उनीहरूलाई ३ ग्राम ७०० मिलिग्राम ब्राउनसुगरसहित पक्राउ गरिएको प्रहरीले जनाएको छ।

लागुऔषधको कारोबार भइरहेको भन्ने विशेष गोप्य सूचनाको आधारमा जिल्ला प्रहरी कार्यालय र लागुऔषध नियन्त्रण ब्यूरो, शाखा कार्यालय सुर्खेतबाट खटिएको संयुक्त प्रहरी टोलीले उक्त कारबाही गरेको हो। प्रहरीका अनुसार, लाटीकोईलीको मिलनटोलमा शंकास्पद अवस्थामा भेटिएका व्यक्तिमाथि सोधपुछ र खानतलासी गर्दा लागुऔषध बरामद भएको थियो।

पक्राउ पर्ने मुख्य व्यक्ति अछामको कमलबजार नगरपालिका-८ घर भई हाल वीरेन्द्रनगर-९ लाटीकोईलीमा डेरा गरी बस्ने २५ वर्षीय आर्यन शाह रहेका छन्। प्रहरीले उनको शरीर र डेरा कोठामा खानतलासी गर्दा उक्त परिमाणको ब्राउनसुगर बरामद गरेको हो।

पक्राउ परेका शाह र उनीसँगै पक्राउ परेका अन्य दुई जनालाई नियन्त्रणमा लिई लागुऔषध (नियन्त्रण) ऐन, २०३३ अनुसार थप अनुसन्धान अगाडि बढाइएको जिल्ला प्रहरी कार्यालय सुर्खेतले जानकारी दिएको छ।