सुर्खेतमा बाेलेराेकाे ठक्करबाट १ जनाकाे मृत्यु

सुर्खेत। सुर्खेतको वीरेन्द्रनगर नगरपालिका–११ स्थित धुलियाबिटमा आज बिहान बोलेरो गाडीको ठक्करबाट एक जनाको मृत्यु भएको छ भने एक जना महिला घाइते भएकी छन् ।

जिल्ला प्रहरी कार्यालय सुर्खेतका प्रहरी नायव उपरिक्षक माेहनजंग बुढथापाका अनुसार गुमीबाट सुर्खेततर्फ आइरहेको कर्णाली प्रदेश ०२००१ च ०९४४ नम्बरको बोलेरो गाडीले सडक छेउमा रोकिएको मिनिट्रकबाट घाँस झार्दै गरेका दुई स्थानीयलाई ठक्कर दिएको थियो ।

दुर्घटनामा परी ३४ वर्षीय प्रेम बुढा गम्भीर घाइते भएका थिए। पेट र टाउकोमा गम्भीर चोट लागेका बुढाको उपचारका क्रममा  बिहान ११ बजेतिर मृत्यु भएको प्रहरीले जनाएको छ ।

त्यस्तै, ३२ वर्षीया तिलकुमारी बुढा भने खुट्टामा चोट लागेर घाइते भएकी छन्। उनको अवस्था मध्यम रहेको बताइएको छ ।

घटनास्थलमा प्रहरी निरीक्षक अजय डाँगीको कमाण्डमा १६ जना सुरक्षाकर्मी परिचालन गरिएको थियो। बोलेरो चालक लेकबेशी नगरपालिका–६ निवासी २१ वर्षीय यामलाल सुनारलाई प्रहरीले नियन्त्रणमा लिएको छ। बोलेरो र मिनिट्रक दुवै सवारी साधनलाई समेत नियन्त्रणमा लिइएको छ ।

प्रहरीले घटनाबारे थप अनुसन्धान गरिरहेको जनाएको छ ।