रौतहटमा १३३ केजी गाँजा बरामद, चालक फरार

रौतहट  गरुडा नगरपालिका–४ स्थित चपुर गौर सडकखण्डमा सोमबार बिहान प्रहरीले चेकजाँच गर्ने क्रममा ठूलो परिमाणमा लागूऔषध गाँजा बरामद गरेको छ ।

जिल्ला प्रहरी कार्यालयका अनुसार चपुरबाट गौरतर्फ जाँदै गरेको ग ३ च ६८९६ नम्बरको कार चेकजाँचका क्रममा प्रहरीले रोकेपछि चालकले भाग्न खोज्दा गाडी झाझपुल नजिकै सडकको खाल्टोमा खसेको हो ।

प्रहरीले गाडीको डिक्की जाँच गर्दा १३ वटा प्लास्टिकका बोरामा लुकाएर राखिएको करिब १३३ केजी गाँजा फेला पारेको छ। घटनापछि चालक फरार छन् भने गाडी र गाँजा इलाका प्रहरी कार्यालय गरुडाको नियन्त्रणमा रहेको छ । इलाका प्रहरी कार्यालय गरुडाका प्रमुख डिएसपी राजन कार्कीका अनुसार फरार चालकको खोजी तीव्र पारिएको छ र घटनासम्बन्धी थप अनुसन्धान जारी छ ।