पर्वतमा पहिरोले घर पुरिँदा एकको मृत्यु, एकजना अझै बेपत्ता

पर्वत जिल्लाको मोदी गाउँपालिका–३ देउरालीस्थित लाङ्दीमा पहिरोले घर पुरिँदा एक दम्पतीमध्ये श्रीमानको मृत्यु भएको छ भने श्रीमती अझै बेपत्ता छन्। जिल्ला प्रहरी कार्यालय पर्वतका प्रहरी नायब उपरीक्षक (डीएसपी) रविन विष्टका अनुसार स्थानीय ७८ वर्षीय छविलाल विश्वकर्माको शव स्थानीयवासी र सुरक्षाकर्मीको सहयोगमा पुरिएको अवस्थामा फेला परेको हो। उनकी ७५ वर्षीया श्रीमती विष्णुमती विश्वकर्मा पहिरोले पुरिएपछि बेपत्ता भएकी छन्। हाल डिमुवा र कुश्माबाट खटिएको प्रहरी टोली तथा स्थानीयवासीको सहयोगमा पहिरो पन्छाउँदै खोजी कार्य जारी रहेको प्रहरीले जनाएको छ।

डीएसपी विष्टका अनुसार अविरल वर्षाका कारण उद्धार कार्यमा कठिनाइ भइरहेको छ। गए रातिदेखि परेको भारी वर्षाले आज बिहान घरमाथिबाट खसेको पहिरोले उनीहरूको घर पुरिएको थियो। घटनाका बेला घरमा रहेका दम्पती पहिरोमा परेका थिए भने उनीहरूकी २८ वर्षीया बुहारी पवित्रा विश्वकर्मा भने भागेर ज्यान जोगाउन सफल भएकी छिन्।