सुर्खेतमा ब्राउनसुगरसहित एक व्यक्ति पक्राउ

सुर्खेत। जिल्ला प्रहरी कार्यालय सुर्खेतले वीरेन्द्रनगरबाट अवैध लागूऔषध ब्राउनसुगरसहित एक जनालाई पक्राउ गरेको छ। पक्राउ पर्नेमा वीरेन्द्रनगर नगरपालिका-८ गौरीशंकर टोलका ४८ वर्षीय श्याम कुमार श्रेष्ठ रहेका छन्।

गौरीशंकर टोलमा लागूऔषधको कारोबार भइरहेको भन्ने गोप्य सूचनाका आधारमा जिल्ला प्रहरी कार्यालय र लागूऔषध नियन्त्रण ब्यूरोको संयुक्त टोलीले श्रेष्ठलाई मंगलबार साँझ उनकै घरबाट पक्राउ गरेको हो।

जिल्ला प्रहरी कार्यालयका प्रवक्ता प्रहरी नायव उपरीक्षक मोहनजंग बुढथापाका अनुसार, श्रेष्ठको घरमा खानतलासी गर्दा १ ग्राम २८० मिलिग्राम ब्राउनसुगर जस्तो देखिने धुलो पदार्थ बरामद गरिएको छ।

पक्राउ परेका श्रेष्ठलाई नियन्त्रणमा लिई लागूऔषध सम्बन्धी कसुरमा मुद्दा दर्ता गरी अदालतबाट म्याद थप गरेर थप अनुसन्धान भइरहेको प्रहरीले जनाएको छ।