‘प्रहरी हुँ’ भन्दै धम्क्याएर पैसा असुल्ने युवा पक्राउ

विराटनगर । ‘प्रहरी हुँ’ भन्दै धम्क्याएर भारतीय बजारका नेपाली ग्राहाकसँग पैसा असुल्ने एक जना युवा विराटनगरबाट शुक्रबार पक्राउ परेका छन्।

नक्कली प्रहरी बनेर पैसा असुल्ने विराटनगर महानगरपालिका–१२ का २५ वर्षीय धनकुमार थारुलाई पक्राउ गरिएको मोरङ प्रहरी प्रवक्ता डीएसपी कोपिला चुँडालले बताइन्। उनका अनुसार थारुलाई विराटनगर–१६ स्थित रानी–जोगवनी सडक खण्डबाट पक्राउ गरिएको हो। थारुले डर र त्रास देखाएर शारीरिक रूपमा अपांगता भएका व्यक्तिलगायत सर्वसाधारणलाईसँग पैसा असुल्ने गरेको प्रारम्भिक अनुसन्धानबाट खुलेको छ।

‘भारतको जोगवनीबाट घरयासी सामान लिएर आउनेहरुलाई दुःख दिँदै र धम्क्याउँदै पैसा लिने गरेको पाइयो,’ उनले भनिन्, ‘प्रहरी हुँ भन्दै डर त्रास देखाउने गरेको खुलेको छ।’ ‘म प्रहरी हो’ भनेर पैसा असुल्ने गरेको पाइएपछि थारुलाई नियन्त्रणमा लिएर अनुसन्धान एवं कारबाहीको दायरामा ल्याइएको जानकारी चुँडालले दिइन्।