कैलालीमा सुत्केरी महिलाको रहस्यमय मृत्यु, १६ दिनको शिशु सकुशल

कैलाली — कैलालीको गौरीगंगा नगरपालिका–७ कैलाशपुमा एक सुत्केरी महिला मृत अवस्थामा फेला परेकी छन्। २५ वर्षीया तुलसी नाथ शुक्रबार बिहान करिब ६ बजे घर नजिकैको सडकको नालामा मृत भेटिएकी हुन्।

उनी १६ दिनअघि मात्र आमाबनेकी थिइन्। उनको नवजात शिशु भने सकुशल रहेको जिल्ला प्रहरी कार्यालय कैलालीका प्रहरी नायब उपरीक्षक (डिएसपी) राजकुमार सिंहले जानकारी दिए।

“उनको शव घर नजिकैको नालामा भेटिएको हो, घटनाबारे अनुसन्धान भइरहेको छ,” डिएसपी सिंहले भने।

शव पोष्टमार्टमका लागि प्रादेशिक अस्पताल धनगढी पठाइएको छ। मृत्युको कारण हालसम्म स्पष्ट भइसकेको छैन। घटनाबारे थप अनुसन्धान जारी रहेको प्रहरीले जनाएको छ।