कर्तव्य ज्यान मुद्दाका फरार अभियुक्त १६ वर्षपछि पक्राउ

 सुर्खेत।  कर्तव्य ज्यान मुद्दामा १६ वर्षअघिदेखि फरार रहेका एक अभियुक्तलाई जिल्ला प्रहरी कार्यालय सुर्खेतले पक्राउ  गरेकाे छ । सुर्खेतको चौकुने गाउँपालिका-७ का जुलु विश्वकर्माको हत्यामा संलग्न रहेको आरोपमा बर्दियाको बारबर्दिया नगरपालिका-३ का ६२ वर्षीय दल बहादुर सुजीलाई प्रहरीले पक्राउ गरेको हो।

वि.सं. २०६६ साल असार ४ गते विश्वकर्माको हत्या गरी सुजी फरार भएका थिए। घटनापश्चात उनी आफ्नो ठेगाना परिवर्तन गरी बर्दियामा बस्दै आएका थिए। जिल्ला प्रहरी कार्यालय सुर्खेतबाट खटिएको विशेष टोलीले लामो अनुसन्धान र खोजतलासपछि सोमबार (असार ४ गते) साँझ ५ बजे उनलाई बर्दियास्थित आफ्नै घरबाट पक्राउ गरेको हो।

जिल्ला प्रहरी कार्यालय सुर्खेतका अनुसार, जिल्ला अदालत सुर्खेतबाट जारी भएको पक्राउ पुर्जीका आधारमा उनलाई नियन्त्रणमा लिइएको हो। पक्राउ परेका सुजीलाई आवश्यक अनुसन्धान तथा कानुनी कारबाहीका लागि सुर्खेत ल्याइएको प्रहरीले जनाएको छ।