राष्ट्र बैंकले एकैदिन ९० अर्ब रुपैयाँ उठाउँदै, तरलता व्यवस्थापनको प्रयास

 नेपाल राष्ट्र बैंकले बुधबार एकैदिन बैंकिङ प्रणालीबाट ९० अर्ब रुपैयाँ निक्षेप उठाउने भएको छ। पछिल्लो समय बजारमा बढ्दो तरलता सन्तुलनमा ल्याउने उद्देश्यले राष्ट्र बैंकले यस्तो कदम चालेको हो।

यसअघि पनि राष्ट्र बैंकले ८० अर्ब रुपैयाँसम्म एकैदिन उठाइसकेको थियो। यसपटक राष्ट्र बैंकले २१ दिन अवधिको लागि बोलकबोल (बिड) आह्वान गरेको छ, जसमा ‘क’, ‘ख’ र ‘ग’ वर्गका इजाजतपत्रप्राप्त बैंक तथा वित्तीय संस्थाहरूले सहभागी हुन पाउनेछन्। बोलकबोल कार्यक्रम बुधबार दिउँसो ३ बजेका लागि तय गरिएको छ। सहभागी संस्थाले न्यूनतम १० करोड रुपैयाँ र त्यसपछि पाँच–पाँच करोडले भाग जाने गरी अधिकतम रकम बोलकबोल गर्न सक्नेछन्।

सावाँ र ब्याज भुक्तानी मिति आगामी साउन ७ गते निर्धारण गरिएको छ। ब्याजदर बोलकबोलको आधारमा तय हुनेछ, र संस्थाहरूले ० दशमलव पछिको चार अंकसम्म ब्याजदर उल्लेख गर्नुपर्नेछ। बहुब्याजदर (Multiple Rate Bidding) प्रणाली पनि लागु हुनेछ। राष्ट्र बैंकले तरलता व्यवस्थापनका यस्ता उपकरणहरू प्रयोग गर्दै बजारमा सन्तुलन कायम राख्न प्रयास गरिरहेको छ। हालको परिस्थितिमा यस प्रकारको निक्षेप सङ्कलन कदमलाई वित्तीय अनुशासनको रूपमा हेरिएको छ।