बुधबार नेपाली बजारमा सुनको मूल्यमा सामान्य वृद्धि, चाँदीको मूल्यमा उल्लेख्य उकालो

नेपाली बजारमा बुधबार सुनको मूल्य सामान्य रूपमा बढेको छ भने चाँदीको मूल्यमा उल्लेख्य वृद्धि देखिएको छ।

नेपाल सुनचाँदी व्यवसायी महासंघका अनुसार बुधबार छापावाल सुनको मूल्य तोलामा १ लाख ९५ हजार ९०० रुपैयाँ पुगेको छ। यसअघि मंगलबार यो मूल्य तोलामा १ लाख ९५ हजार रुपैयाँमा कायम थियो।

सुनको तुलनामा चाँदीको मूल्यमा भने ठूलो वृद्धि देखिएको छ। मंगलबार तोलामा २ हजार १६० रुपैयाँमा कारोबार भएको चाँदी बुधबार ६५ रुपैयाँले बढेर तोलामा २ हजार २२५ रुपैयाँ पुगेको महासंघले जनाएको छ।

महासंघले दैनिक अन्तर्राष्ट्रिय बजार मूल्य, मुद्रा विनिमय दर र माग–आपूर्तिको आधारमा सुनचाँदीको मूल्य निर्धारण गर्दै आएको छ।