बाघको आक्रमणमा परेर एक गोठालाको मृत्यु

बारा जिल्लाको अमलेखगञ्ज नजिकको जंगलमा बाघको आक्रमणबाट एक गोठालाको मृत्यु भएको छ । जिल्ला प्रहरी कार्यालय बाराका अनुसार, मङ्गलवार बाख्रा चराउन जंगल गएका ५५ वर्षीय चन्द्र बहादुर भुलन मृत अवस्थामा फेला परेका हुन् । उनी मकवानपुरको मनहरी घर भई हाल जितपुरसिमरा उपमहानगरपालिका–२१, अमलेखगञ्जमा बसोबास गर्दै आएका थिए । भुलन वीरबहादुर थिङको गोठमा बाख्रा चराउने काम गर्दै आएका थिए । मङ्गलवार बिहान चकरी जंगलतर्फ बाख्रा चराउन गएका उनी साँझसम्म घर नफर्किएपछि आफन्तहरूले प्रहरीलाई खबर गरेका थिए ।

प्रहरी र स्थानीयवासीको खोजी अभियानपछि बुधबार बिहान साढे ७ बजे दक्षिणकाली सामुदायिक वन क्षेत्रको खोल्सामा बाघले खाएको अवस्थामा उनको शव फेला परेको जिल्ला प्रहरी कार्यालय बाराका प्रवक्ता डिएसपी विजयराज पण्डितले जानकारी दिए । सुरक्षा निकायले वन क्षेत्रमा जोखिम बढेको भन्दै सतर्कता अपनाउन स्थानियहरूलाई अनुरोध गरेको छ।