सुर्खेतमा फोर्स गाडी रोकिराखेको ट्रकमा ठोक्किँदा  २ जना घाइते

सुर्खेत ।  सुर्खेतको सिम्ता गाउँपालिका-४ बालिखोलास्थित छिन्चु-जाजरकोट सडकखण्डमा फोर्स गाडी रोकिराखेको ट्रकमा ठोक्किँदा  २ जना घाइते भएका छन।
इलाका प्रहरी कार्यालय बादेपिपलका अनुसार नेपालगञ्जबाट जाजरकोटका लागि छुटेको क.प्र. ०२-००१ ख ०८८७ नम्बरको फोर्स गाडी आज बिहान करिब २ बजेतिर सडक छेउमा बिग्रिएर रोकिराखेको ट्रकको पछाडि ठोक्किएको हो।

घाइते हुनेमा जाजरकोटको कुसे गाउँपालिका-३ का २२ वर्षीय निमबहादुर विक र सोही गाउँपालिका-२ का ४२ वर्षीय जयबहादुर सिंह रहेका छन्।

फोर्स गाडीमा सवार १७ जना यात्रुमध्ये दुई जना घाइते भएकाे प्रहरिले जनाएकाे  छ।  दुवै जनाको सल्यानको सल्लीबजारस्थित सिटी अस्पतालमा उपचार भइरहेको छ।
घटनाको जानकारी पाउनासाथ इलाका प्रहरी कार्यालय बादेपिपलको टोली घटनास्थलमा पुगेको थियो। प्रहरीले फोर्स गाडीका चालक सुर्खेत, भेरीगंगा नगरपालिका-६ का ५१ वर्षीय डम्बर डाँगीलाई गाडीसहित नियन्त्रणमा लिएको छ।
घटनाबारे थप अनुसन्धान भइरहेको प्रहरीले जानकारी दिएको छ।