जाजरकोटमा बरामद गरिएको सवा किलो अवैध लागू औषध नष्ट

जाजरकोट।  जाजरकोट प्रहरीले विशेष अभियानका क्रममा बरामद गरेको १ किलो १ सय ५० ग्राम अवैध लागू औषध (अफिम) आज नष्ट गरेको छ । अदालत, जिल्ला प्रशासन कार्यालय लगायत विभिन्न सरोकारवाला निकायका प्रतिनिधिको रोहबरमा  लागू औषध जलाएर नष्ट गरिएको हो ।

जिल्ला प्रहरी कार्यालय परिसरभित्रको खाली जग्गामा उक्त लागू औषध नष्ट गरिएको प्रहरीले जनाएको छ । लागू औषध नष्ट गर्ने क्रममा जाजरकोट जिल्ला अदालतका प्रतिनिधि डिठ्ठा सुरेन्द्र राना मगर, जिल्ला प्रशासन कार्यालयका ना.सु. गणेश बहादुर नेपाली, भेरी नगरपालिकाका जनस्वास्थ्य निरीक्षक (स्वास्थ्य शाखा प्रमुख) दिप बहादुर वली र जिल्ला प्रहरी कार्यालयका प्रहरी निरीक्षक हरी राम डाँगीको उपस्थिति रहेको थियो ।

उक्त अफिम गत जेठ २२ गते जुनिचाँदे गाउँपालिका वडा नं. ७, निपानेबाट बरामद गरिएको थियो । ईलाका प्रहरी कार्यालय पंचलादहबाट खटिएको प्रहरी टोलीले कुशे गाउँपालिका वडा नं. ३ का स्थायी बासिन्दा निरज कुमार पुनलाई पक्राउ गरेको थियो । पुनले प्लास्टिकको झोलाभित्र तेलको पोकासँगै छुट्टाछुट्टै पाँचवटा पोकामा लुकाएर राखेको अवस्थामा उक्त खैरो रङ्गको अर्धठोस पदार्थ बरामद भएको प्रहरीले जनाएकाे छ ।

पक्राउ परेका पुनमाथि लागू औषध नियन्त्रण ऐन अनुसार थप अनुसन्धान भइरहेको प्रहरीले जानकारी दिएको छ ।