वीरेन्द्रनगरका विभिन्न होटलबाट २५ जना पक्राउ 

सुर्खेत। जिल्ला प्रहरी कार्यालय सुर्खेतले वीरेन्द्रनगरका विभिन्न होटलबाट २५ जनालाई पक्राउ गरेको छ । वीरेन्द्रनगर नगरपालिका-६, बुद्धपथस्थित होटलहरूमा सार्वजनिक हित र नैतिकता विरुद्धका क्रियाकलाप भइरहेको सूचनाको आधारमा प्रहरीले मंगलबार राति छापा मारेको थियो ।

जिल्ला प्रहरी कार्यालयका अनुसार बुद्धपथमा रहेका हार्दिक, दंगाली र विकाश होटलमा छापा मार्दा  होटल सञ्चालकहरू सहित ११ जना महिला र १४ जना पुरुष लाई नियन्त्रणमा लिइएको हो । 

जिल्ला प्रहरी कार्यालयका अनुसार ती होटलहरूमा विभिन्न किसिमको अशान्ति, अभद्रता फैलाउने तथा हो-हल्ला गरी सार्वजनिक शान्तिमा खलल पुर्‍याइएको थियो । विशेष सूचनाको आधारमा खटिएको प्रहरी टोलीले उनीहरूलाई राति करिब ११:३० बजे पक्राउ गरेको हो ।

जिल्ला प्रहरी कार्यालय सुर्खेतका प्रवक्ता तथा प्रहरी नायव उपरीक्षक (डीएसपी) मोहनजंग बुढथापाले पक्राउ परेका सबैलाई ‘सार्वजनिक हित, स्वास्थ्य, सुरक्षा, सुबिधा र नैतिकता विरुद्धको कसुर’ मा मुद्दा दर्ता गरिएको जानकारी दिनुभयो ।  बुढथापाका अनुसार, जिल्ला प्रशासन कार्यालयबाट म्याद थप गरी घटनाबारे थप अनुसन्धान भइरहेको छ ।