राष्ट्र बैंकले बैंकिङ प्रणालीबाट ४० अर्ब रुपैयाँ संकलन गर्न लागेको छ

काठमाडौं, २९ जेठ — नेपाल राष्ट्र बैंकले बैंकिङ प्रणालीमा रहेको अतिरिक्त तरलता व्यवस्थापन गर्न आज ४० अर्ब रुपैयाँ संकलन गर्ने भएको छ।

राष्ट्र बैंकले २१ दिन अवधिका लागि निक्षेप संकलनको बोलकबोल आह्वान गरेको हो, जसको समय आज दिउँसो ३ बजेसम्म तोकिएको छ। बैंक तथा वित्तीय संस्थाहरूले न्यूनतम १० करोड रुपैयाँको बोलकबोल गर्न सक्नेछन् भने अधिकतम रकम पाँच करोडको गुणकमा विभाजन हुने गरी निर्धारण गरिएको छ।

सावाँ र ब्याज असार १८ गते भुक्तानी गर्नुपर्नेछ। बोलकबोलमार्फत निर्धारण हुने ब्याजदरमा प्रतिस्पर्धा गर्न सकिनेछ। बहुब्याजदरमा पनि बहुबोलकबोल पेश गर्न सकिने व्यवस्था छ।

यस निक्षेप संकलन प्रक्रियामा ‘क’, ‘ख’ र ‘ग’ वर्गका नेपाल राष्ट्र बैंकबाट इजाजत प्राप्त बैंक तथा वित्तीय संस्थाहरू मात्र सहभागी हुन पाउने छन्।