बिहान खाली पेटमा मनतातो पानी पिउँदा यस्ता ८ अचुक फाइदा

काठमाडौं। स्वस्थ जीवनशैली अपनाउने चाहना सबैमा हुन्छ, तर व्यस्त जीवनका कारण महँगा उपायहरू अपनाउन सबैलाई सम्भव नहुन सक्छ। तर, के तपाईंलाई थाहा छ, हरेक बिहान खाली पेटमा एक गिलास मनतातो पानी पिउने सामान्य बानीले तपाईंको स्वास्थ्यमा चमत्कारी फाइदा पुर्‍याउन सक्छ? स्वास्थ्य विज्ञहरूका अनुसार, यो सरल उपायले शरीरलाई भित्रैबाट सफा गरी विभिन्न रोगहरूबाट बचाउन मद्दत गर्दछ।

आउनुहोस्, जानौँ बिहान खाली पेटमा मनतातो पानी पिउनुका प्रमुख ८ फाइदाहरू:

१. रक्तसंचार र पाचन प्रणालीमा सुधार
दिनहुँ बिहान खाली पेटमा मनतातो पानी पिउनाले शरीरमा रक्तनलीहरूलाई आराम मिल्छ, जसले गर्दा रक्तसंचार सन्तुलित र नियमित हुन्छ। यसले पेटमा हुने एसिडिटीको समस्यालाई कम गर्नुका साथै पाचन प्रणालीलाई सफा राख्न मद्दत गर्दछ, जसले दिनभरि स्फूर्ति प्रदान गर्छ।

२. भोक नलाग्ने समस्याको अन्त्य
यदि तपाईंलाई समयमा भोक नलाग्ने समस्या छ भने मनतातो पानी तपाईंका लागि उत्तम घरेलु उपचार हुन सक्छ। एक गिलास मनतातो पानीमा एउटा कागतीको रस, एक चिम्टी मरिच र नुन मिसाएर पिउँदा यसले पाचन प्रणालीलाई सक्रिय बनाउँछ र भोक जगाउन मद्दत गर्दछ।

३. कब्जियत र जोर्नी दुखाइमा राहत
बिहानको समयमा मनतातो पानी पिउनाले आन्द्राको चाललाई सहज बनाउँछ, जसले कब्जियत जस्तो पुरानो समस्याबाट छुटकारा दिलाउँछ। यसका साथै, शरीरमा पानीको पर्याप्त मात्राले जोर्नीहरूलाई लचिलो बनाउँछ र हड्डी मजबुत बनाउन पनि सहयोग गर्दछ।

४. रुघाखोकीमा अचुक औषधि
मौसम परिवर्तनसँगै देखिने रुघाखोकीको समस्यामा मनतातो पानी पिउनु निकै फाइदाजनक मानिन्छ। यसले घाँटीको खसखस र छातीमा जमेको कफलाई बाहिर निकाल्न मद्दत गर्छ, जसले शरीरलाई आराम मिल्छ।

५. चम्किलो छाला र तौल नियन्त्रण
हरेक दिन बिहान मनतातो पानी पिउनाले शरीरबाट विषाक्त पदार्थ बाहिर निकाल्छ, जसले छालामा देखिने चाउरीपना र दागधब्बा कम गर्छ। यसले छालालाई चम्किलो र स्वस्थ बनाउँछ। चिया-कफीको सट्टा मनतातो पानी वा ग्रीन टी पिउने बानीले शरीरको मेटाबोलिजम बढाएर तौल नियन्त्रणमा पनि सघाउ पुर्‍याउँछ।

६. रोग प्रतिरोधी क्षमतामा वृद्धि
बिहान खाली पेटमा मनतातो पानीमा कागतीको रस मिसाएर पिउनाले शरीरले भिटामिन ‘सी’ प्राप्त गर्छ। यसले शरीरको रोग प्रतिरोधी क्षमतालाई बलियो बनाउँछ र सामान्य संक्रमणबाट बचाउँछ।

७. थकान र मांशपेशीको दुखाइ कम
दिनभरिको दौडधूपले हुने थकान कम गर्न पनि मनतातो पानीले सहयोग गर्दछ। यसले शरीरका मांशपेशीहरूलाई आराम दिन्छ र तन्दुरुस्त बनाउन मद्दत गर्दछ, जसले गर्दा तपाईं दिनभर ऊर्जावान् महसुस गर्नुहुन्छ।

८. टाउको दुखाइ र मुखको दुर्गन्धबाट छुटकारा
प्रायः शरीरमा पानीको कमी (डिहाइड्रेसन) का कारण टाउको दुख्ने गर्दछ। बिहान उठ्नेबित्तिकै मनतातो पानी पिउनाले शरीरलाई हाइड्रेट गर्छ र टाउको दुखाइबाट राहत दिन्छ। साथै, यसले मुखमा रहेका ब्याक्टेरियालाई सफा गरी श्वासको दुर्गन्ध हटाउन पनि मद्दत गर्दछ।