म्यान्मार भूकम्प: १७ नेपालीको मृत्यु

काठमाडौं – म्यान्मारमा शुक्रबार गएको ७.९ रेक्टरस्केलको शक्तिशाली भूकम्पमा परी अहिलेसम्म १७ जना नेपालीभाषीको मृत्यु भएको छ। तीमध्ये ९ जनाको शव भेटिएको छ भने अरु नेपालीभाषीको खोजी कार्य जारी रहेको बर्मेली नेपाली साहित्यकार लक्ष्मण न्यौपानेले जानकारी दिएका छन्।

सबैभन्दा बढी क्षति मान्डेले क्षेत्रमा भएको बताइएको छ। निधन भएका नेपालीभाषीहरू पनि उतैका रहेको न्यौपानेले बताए। मृतकमध्ये देवी सिंखडाका छोरा खतिवडा, दाहाललगायतका परिवारका सदस्यहरू रहेको जनाइएको छ।

भूकम्पको धक्का थाइल्याण्डसम्म पुगेको थियो, जसले ठूलो जनधनको क्षति गराएको छ। म्यान्मारमा अहिलेसम्म १,००० भन्दा बढी शव फेला परिसकेको छ। उद्धारमा खटिएका सुरक्षाकर्मीहरूले मृतकको संख्या अझै बढ्न सक्ने बताएका छन्। अहिले पनि त्यहाँ उद्धार र राहतको काम जारी छ।