जन्मदर्ता प्रोत्साहन गर्न नवजात शिशुको खातामा पाँच हजार

भिरकोट नगरपालिका–८ ले जन्मदर्ता प्रोत्साहनका लागि नवजात शिशुको खातामा रु पाँच हजार जम्मा गरिदिने अभियान सुरु गरेको छ। वडा कार्यालयले रु पाँच हजार र अभिभावकले थप रु पाँच हजार गरी कुल रु १० हजार खातामा जम्मा गरिनेछ। यो रकम शिशुको उमेर १८ वर्ष पुगेपछि मात्र निकाल्न सकिने व्यवस्था गरिएको छ।

चालु आर्थिक वर्षदेखि लागू भएको यो योजनाले नवजात शिशुहरूको अभिलेखिकरणमा सुधार ल्याउने अपेक्षा गरिएको छ। हालसम्म ३१ जना बालबालिकाको जन्मदर्ता भइसकेको छ। वडा कार्यालयले सुत्केरी भेटघाट, न्यानो भोटो वितरण र स्वास्थ्य परामर्श सेवा पनि सञ्चालन गरिरहेको छ।