खराब मौसमका कारण हवाई उडानमा अवरोध

प्रतिकूल मौसमका कारण हवाई सेवा प्रभावित भएको छ। त्रिभुवन अन्तर्राष्ट्रिय विमानस्थल कार्यालयका अनुसार, भिजिबिलिटी कमजोर हुँदा कैयौँ हवाई उडान प्रभावित भएका छन्।

कार्यालयका प्रवक्ता रिञ्जी शेर्पाका अनुसार, दोहाबाट काठमाडौं आउन लागेको कतार एयरवेजको क्यूआर६५२ जहाजलाई कोलकातामा डाइभर्ट गरिएको छ। त्यसबाहेक, मलेसियाबाट आएको नेपाल एयरलाइन्स र एयर चाइनाका विमानहरू पनि डाइभर्ट भएका छन्। मौसमकै कारण सिचुआन एयरलाइन्सको उडान रद्द गरिएको छ।

आन्तरिक उडानहरू पनि प्रभावित भएका छन्। त्रिभुवन विमानस्थलका अनुसार, काठमाडौँ–पोखरा, काठमाडौँ–भरतपुर, काठमाडौँ–नेपालगञ्ज, काठमाडौँ–राजविराज, काठमाडौँ–विराटनगर, काठमाडौँ–जनकपुर, काठमाडौँ–भद्रपुर, काठमाडौँ–भैरहवा लगायतका केही उडान रद्द भएका छन् भने अधिकांश उडान ढिलाइ भएका छन्।

प्रवक्ता शेर्पाका अनुसार, दिउँसोदेखि मौसममा सुधार आएसँगै उडानहरू सामान्य हुँदै गएका छन्।