सहकारी ठगी मुद्दामा रवि लामिछानेविरुद्ध तीन जिल्लाका सरकारी वकिलहरूको बहस

चितवनको साहारा सहकारी ठगी प्रकरणमा चितवन प्रहरीको हिरासतमा रहेका राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्धको बहसलाई थप बलियो बनाउन छिमेकी जिल्लाबाट सरकारी वकिलहरू झिकिएका छन्।

चितवनका जिल्ला सरकारी वकिल कार्यालयका रवि न्यौपाने, अमृत सुवेदी, र बुद्धबहादुर थापाले प्रारम्भिक चरणमा बहस गरे पनि, महान्याधिवक्ता कार्यालयको निर्देशनमा पर्साका भोलानाथ निरौला, धादिङका दशरथ पंगेनी, र मकवानपुरका शम्भुकुमार बस्नेतलाई पनि चितवन ल्याइएको छ।

सरकारी वकिल कार्यालयका अनुसार, मुद्दामा तथ्यहरू प्रभावकारी रूपमा प्रस्तुत गर्न र कमजोर पक्ष रहन नदिन यी वकिलहरूको टोलीलाई समन्वय गरिएको हो।

सहकारी पीडितहरूको तर्फबाट कानूनी टोलीमा वरिष्ठ अधिवक्ता दिनेश त्रिपाठीसहित अन्य अधिवक्ताहरूले बहस गरिरहेका छन्। प्रतिवादी रवि लामिछानेको तर्फबाट भने ११ वकिलको टोलीले प्रतिरक्षा गर्ने तयारी गरेको छ।

चितवन जिल्ला अदालतका न्यायधीश दयाराम ढकालको इजलासमा बहस अहिले दोस्रो दिनमा प्रवेश गरेको छ। अदालतको फैसला कुन पक्षको पक्षमा पर्न जान्छ भन्ने चासो सर्वत्र छ।