पोखरामा नेपाल–चीन मैत्रीपूर्ण डुङ्गा दौड प्रतियोगिता शुरू

पर्यटकीय नगरी पोखराको फेवातालमा नेपाल–चीन मैत्रीपूर्ण ’ड्रागन बोट रेस’ अर्थात् डुङ्गा दौड प्रतियोगिता शुरू भएको छ । नेपाल र चीनबीचको सांस्कृतिक तथा जनस्तरसम्मको सम्बन्ध सुमधुर बनाउँदै नेपालको पर्यटन प्रवद्र्धन गर्ने उद्देश्यले दोस्रो संस्करणको नेपाल–चीन मैत्रीपूर्ण डुङ्गा दौड प्रतियोगिता आजदेखि भएको हो ।

गण्डकी प्रदेश सरकार, पोखरा महानगरपालिका, चिनियाँ दूतावास र नेपाल पर्यटन बोर्डले संयुक्त रूपमा आयोजना गरेको प्रतियोगितामा नेपाल, चीन र सिङ्गापुरका २० वटा समूह सहभागी छन् । भोलिसम्म सञ्चालन हुने प्रतियोगितामा भाग लिन चीनको छेन्दुबाट विमान चार्टर्ड गरी एक सय २९ जना खेलाडी पोखरा आएका छन् ।

प्रतियोगितामा चीनका आठ, सिङ्गापुरका एउटा र नेपालका विभिन्न ठाउँबाट ११ वटा समूह रहेका छन् । नेपालको तर्फबाट प्रतियोगितामा गण्डकी, बाग्मती, कर्णाली, त्रिभुवन आर्मी क्लब, ड्रागन बोट गण्डकी, बेगनास टोली, रूपाताल टोली र नेपाल र्‍याफ्टिङ एजेन्सिज एसोसिएसन (नारा) सहित ११ वटा टोलीको सहभागिता छ ।

प्रतियोगितामा पाँच सय र दुई सय मिटर दौडका विजेता टोलीलाई पाँच हजार अमेरिकी डलर, उपविजेतालाई दुई हजार डलर र तृतीय हुने टोलीलाई एक हजार दुई सय अमेरिकी डलर पुरस्कार प्रदान गरिने आयोजकले जनाएको छ ।