गुल्मीमा गाडी दुर्घटना : पतिको मृत्यु, पत्नी र छोरासहित ५ जना घाइते

गुल्मीमा गाडी दुर्घटना हुँदा एक जनाको मृत्यु भएको छ । भने अन्य पाँच जना घाइते भएका छन ।

शुक्रबार साँझ बुटवलबाट गुल्मीको देउरालीतर्फ आउँदै गरेको सुदुरपश्चिम प्रदेश १००१ ज १३८५ नम्बरको गाडी मुसिकोट नगरपालिका -४ दजाकोटमा दुर्घटना भएको हो ।
दुर्घटनामा मृत्यृ हुने रेसुङ्गा नगरपालिका- ८ का ४५ वर्षीय रबिनकुमार श्रीस रहेको प्रहरीले जनाएको छ ।

जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक शंकर पोखरेलका अनुसार दुर्घटनामा गम्भीर घाइते भएका रबिनकुमारको गुल्मी अस्पतालमा उपचारको क्रममा मृत्यु भएको हो ।

दुर्घटनामा मृतक श्रीसकी ३८ वर्षीय श्रीमती वसन्ती श्रीस र उनका छोरा ८ वर्षीय एक्सन श्रीस पनि घाइते भएका छन् ।

त्यसैगरी गाडी चालक गुल्मीको मुसिकोट नगरपालिका वडा -२ देउरालीका २४ वर्षीय दिपक सुनार, सोही ठाउँका २० वर्षीय माधव आचार्य र ४३ वर्षीय गंगा भट्टराई पनि घाइते भएका प्रहरीले जनाएको छ ।

घाइतेहरुलाई गुल्मी अस्पतालमा सामान्य उपचारपछि थप उपचारका लागि पाल्पा रेफर गरिएको छ । घटनाको थप विवरण आउन बाँकि रहेको प्रहरीले जनाएको छ ।