घरायसी विवादमा झगडा हुँदा श्रीमानले गरे श्रीमतीको हत्या, दुई छोरी घाइते

घरायसी विवादमा झगडा हुँदा श्रीमानले अाफ्नै श्रीमतीको हत्या गरेका छन भने दुई छोरी घाइते भएका छन ।

बाराकाे निजगढ नगरपालिका- ९ बस्ने विमलकुमार बस्नेतले मंगलबार राति पौने आठ बजेको समयमा आफ्नी श्रीमती लक्ष्मी राईको हत्या गरेका हुन ।

बस्नेत राति रक्सी खाएर घर आएको क्रममा श्रीमान श्रीमतीबीच वाइफाइको पैसा तिर्ने कुरालाई लिएर विवाद भएको थियो । जिल्ला प्रहरी कार्यालय बाराका अनुसार वाइफाइको रिचार्ज गर्न पैसा नभएको रक्सी खान कहाँबाट पैसा आयो भनी लक्ष्मीले प्रश्न गरेपछि विमलले खुर्पा प्रहार गरी हत्या गरेका हुन ।

सो विवाद छुट्टाउन गएका दुई जना छोरीहरूमाथि पनि विमलले प्रहार गरे । झगडाको क्रममा १८ वर्षीया गंगा र १५ वर्षीया छोरी जमुना घाइते भएका छन । घाइतेमध्ये जमुनालाई वीरगञ्जको नेशनल मेडिकल कलेजमा उपचार पछि थप उपचारको लागि काठमाडौं पठाइएको तथा उनको अवस्था गम्भीर रहेको प्रहरीले जनाएको छ ।

घटनाको बारेमा थप अनुसन्धान अघि बढाइएको प्रहरीले बताए ।