अक्सिजनको कमीका कारण नवजात शिशुको मृत्यु

रौतहटको  बौधीमाई नगरपालिकाको स्वास्थ्य चौकीमा अक्सिजनको अभावका कारण नवजात शिशुको मृत्यु भएको छ ।

बौधिमाई -४  इनरवारीस्थित स्वास्थ्य चौकीमा अक्सिजन अभावमा एक जना नवजात शिशुको मंगलबार बिहान मृत्यु भएको हो ।

बौधीमाई नगरपालिका- ४ का गौरीशंकर पटेलका अनुसार आज बिहान पौने ३ बजे इनरवारी स्वास्थ्य चौकीको बर्थिङ सेन्टरमा छोरीको जन्म भएको थियो ।

शिशुलाई समस्या देखिएपछि थप उपचारका लागि वीरगन्ज ल्याउने क्रममा एम्बुलेन्समा अक्सिजन नहुदा मृत्यु भएको पिडित पटेलले बताए ।

थप उपचारको लागि बिहान ५ बजे नवजात शिशुलाई वीरगन्जस्थित तराई अस्पतालमा लैजाँदा चिकित्सकले मृत घोषणा गरेका थिए । इनरवारी स्वास्थ्य चौकीले अक्सिजन अभावमा शिशुको मृत्यु भएको स्वीकार गरेको छ ।

नर्मल जन्मिएको बच्चा नरुँदा परिवारजन तथा अस्पतालका कर्मचारीहरू आत्तिएर शिशुलाई थप उपचारका लागि वीरगञ्ज पठाएको थियो । तर एम्बुलेन्सको अक्सिजन सिलिन्डरमा अक्सिजन नहुँदा बच्चाको मृत्यु भएको थियो ।

बौधीमाई नगरपालिकाका मेयर प्रदीप कुमार यादवले एम्बुलेन्सको अक्सिजन नहुँदा शिशुको मृत्युको दुःखद घटना भएको बताएका छन् ।