खाना पकाउने एलपी ग्यासको कालोबजारी गरेको आरोपमा भक्तपुरमा एक जना पक्राउ परेका छन् ।
उपभोक्तालाई प्रतिसिलिण्डर सात हजार रुपैयाँका दरले ग्यास बिक्री गरेको भन्ने सूचनाका आधारमा भक्तपुरको चाँगुनारायण नगरपालिका–२ दुवाकोटका ५७ वर्षीय तुलसीराम त्वयनालाई आज प्रहरीले पक्राउ गरेको हो ।
उनले सञ्चालन गरेको किराना पसलबाट तीन थान सिलिण्डर नियन्त्रणमा लिइएको जिल्ला प्रहरी परिसर भक्तपुरका प्रहरी नायब उपरीक्षक दीपककुमार कार्कीले जानकारी दिए ।
सुर्खेत, साउन २१ — सुर्खेतको बराहताल गाउँपालिका–५ खर्क मोडमा मिनी ट्रक र मोटरसाइकल ठोक्किँदा एक किशोर गम्भीर घाइते भएका छन् भने दुर्घटनापछि फरार भएका ट्रक चालकलाई प्रहरीले पक्राउ गरेको छ। बुधबार बेलुकी करिब ४ः४५ बजे दैलेखबाट सुर्खेततर्फ आउँदै गरेको क.प्र.०१००१क ०८९२ नम्बरको मिनी ट्रक र विपरीत दिशातर्फ जाँदै गरेको भे.६प. ८७८७ नम्बरको मोटरसाइकल एकापसमा ठोक्किएका थिए। दुर्घटनामा मोटरसाइकलको पछाडि सवार दैलेख दुल्लु नगरपालिका–५ का १४ वर्षीय रजत सिंह साउन गम्भीर घाइते भएका छन्। उनलाई कर्णाली केयर अस्पताल सुर्खेतमा प्राथमिक उपचारपछि थप उपचारका लागि काठमाडौं लगिएको प्रहरीले जनाएको छ। दुर्घटनापछि फरार भएका मिनी ट्रक चालक सुर्खेत पञ्चपुरी नगरपालिका–२ का २४ वर्षीय सन्तोष नेपालीलाई बुधबार प्रहरीले पक्राउ गरेको छ। दुवै सवारी साधन नियन्त्रणमा लिइएको र चालकलाई आवश्यक कारबाहीका लागि इलाका प्रहरी कार्यालय बाबियाचौर पठाइएको प्रहरीले जनाएको छ।
चितवन, साउन २१ — चितवन प्रहरीले २० किलो चरेसजस्तो देखिने पदार्थसहित दुई जनालाई पक्राउ गरेको छ। पक्राउ पर्नेमा मकवानपुरको थाहा नगरपालिका–११ निवासी ४४ वर्षीय मोहन गोले र ३१ वर्षीय भीमबहादुर स्याङतान रहेका छन्। जिल्ला प्रहरी कार्यालय चितवनका अनुसार बुधबार बिहान करिब ९ बजे इच्छाकामना गाउँपालिका–५ मा गोप्य सूचनाका आधारमा इलाका प्रहरी कार्यालय मुग्लिनबाट खटिएको प्रहरी टोलीले पैदल हिँडिरहेका उनीहरूलाई शंकाको आधारमा जाँच गरेको थियो। जाँचका क्रममा उनीहरूको झोलाबाट पहेँलो टेपले बेरिएका ४० वटा पोकामा लुकाइएको २० किलो चरेसजस्तो देखिने पदार्थ बरामद भएको प्रहरीले जनाएको छ। बरामद पदार्थसहित दुवै जनालाई नियन्त्रणमा लिई लागूऔषध सम्बन्धी कसुरमा थप अनुसन्धान भइरहेको प्रहरीले जनाएको छ।
काठमाडौं, साउन २१ — पत्रकारको परिचयपत्र बोकेर लागुऔषध खैरो हेरोइन ओसारपसार गर्दै आएका तीन जनालाई प्रहरीले पक्राउ गरेको छ। लागुऔषध नियन्त्रण ब्युरोको शाखा कार्यालय बर्दिबासबाट खटिएको टोलीले बुधबार सिन्धुलीको दुधौली नगरपालिका–९ बाट बा.१६ च ७८४६ नम्बरको कारसहित तीन जनालाई पक्राउ गरेको हो। पक्राउ पर्नेमा सिरहाको लक्ष्मीपुरका २६ वर्षीय उमेश कुमार यादव, लहान नगरपालिका–१० का ३० वर्षीय रमेश कुमार राम र लक्ष्मीपुर गाउँपालिका–२ का २५ वर्षीय गुल्सन प्रसाद साह रहेका छन्। प्रहरीका अनुसार उनीहरू सिरहाको मिर्चैयाबाट काठमाडौंतर्फ आउँदै गर्दा कारको गियर बक्समा लुकाएर ल्याइएको ४४ ग्राम ३४० मिलिग्राम खैरो हेरोइन बरामद गरिएको हो। कार चालक उमेश यादवको साथबाट 'जनजागरण खबर' नामको पत्रकार परिचयपत्र समेत फेला परेको छ। प्रहरीका अनुसार उक्त कार हुलास फाइनान्सबाट किस्ताबन्दीमा खरिद गरिएको खुलेको छ। घटनाबारे इलाका प्रहरी कार्यालय डकाहा, सिन्धुलीले थप अनुसन्धान अघि बढाएको छ।