युवालाई सीप र रोजगारीतर्फ उन्मुख गर्न चौकुनेमा ३० दिने ड्राइभिङ तालिम सञ्चालन

सुर्खेत। चौकुने गाउँपालिका र कर्णाली प्रदेश उद्योग तथा उपभोक्ता संरक्षण निर्देशनालयको संयुक्त आयोजनामा चौकुनेमा ३० दिने ड्राइभिङ तालिम सञ्चालन गरिएको छ। देवी प्रसाद सापकोटाको अध्यक्षतामा सम्पन्न कार्यक्रमको उद्घाटन वडा नं. ८ का वडा अध्यक्ष तथा सामाजिक विकास समितिका संयोजक कमल जी.सी.को प्रमुख आतिथ्यतामा गरिएको हो।

तालिममा २० जना प्रशिक्षार्थीहरूको सहभागिता रहेको छ भने प्रशिक्षकको रूपमा ललित विकले सहजीकरण गरिरहनुभएको छ। कार्यक्रममा बोल्दै प्रमुख अतिथि कमल जी.सी.ले सीपमूलक तालिमले युवाहरूलाई आत्मनिर्भर बनाउन र रोजगारीका अवसर सिर्जना गर्न महत्वपूर्ण भूमिका खेल्ने बताउनुभयो। उहाँले तालिमबाट प्राप्त ज्ञान र सीपलाई व्यवहारमा उतार्दै सुरक्षित र जिम्मेवार चालक बन्न सहभागीहरूलाई आग्रह गर्नुभयो।

अध्यक्ष देवी प्रसाद सापकोटाले यस्ता तालिमले स्थानीय युवाहरूको क्षमता विकासका साथै स्वरोजगार प्रवर्द्धनमा टेवा पुग्ने विश्वास व्यक्त गर्नुभयो। प्रशिक्षक ललित विकले तालिम अवधिभर सैद्धान्तिक तथा प्रयोगात्मक दुवै प्रकारका ज्ञान र सीप प्रदान गरिने जानकारी दिनुभयो। ३० दिनसम्म सञ्चालन हुने उक्त तालिमबाट सहभागीहरूले सवारी चालकसम्बन्धी आवश्यक ज्ञान, ट्राफिक नियमको पालना तथा सुरक्षित सवारी सञ्चालनका व्यवहारिक सीप हासिल गर्ने अपेक्षा गरिएको छ ।