वीरेन्द्रनगरमा एमालेको घरदैलो कार्यक्रम उत्साहजनक

सुर्खेत । नेपाल कम्युनिस्ट पार्टी (एमाले)ले वीरेन्द्रनगरमा घरदैलो अभियानलाई तीव्र बनाएको छ। मंगलबार वीरेन्द्रनगर नगरपालिका–३ र ६ मा पार्टीले मतदाता भेटघाट तथा घरदैलो कार्यक्रम सञ्चालन गरेको हो।

प्रतिनिधिसभा निर्वाचन नजिकिएसँगै अभियानलाई तीव्रता दिइएको जनाइएको छ। कार्यक्रममा कर्णाली प्रदेशका मुख्य मन्त्री तथा एमालेका सचिव यामलाल कंडेल, केन्द्रीय सदस्य मोहनमाया ढकाल, पद्मा खड्कालगायत सुर्खेत क्षेत्र नं. २ का प्रतिनिधिसभा सदस्य पदका उम्मेदवार कुलमणि देवकोटा सहभागी थिए।

घरदैलोका क्रममा उम्मेदवार देवकोटालाई स्थानीयले फूलमालासहित स्वागत गरेका थिए। उनले देशको विकास र समृद्धिका लागि एमालेलाई मतदान गर्न आग्रह गर्दै जनताप्रति गरेका प्रतिबद्धता पूरा गर्ने बताए।

एमाले सुर्खेतका प्रचार विभाग प्रमुख गंगाराम तिमिल्सेनाले वडा नं. ३ र ६ का विभिन्न टोलमा उत्साहजनक सहभागिता देखिएको र पार्टीको जित सुनिश्चित रहेको दाबी गरे।