जसपाले उम्मेदवार बनाएका व्यक्ति नै एमाले प्रवेश गरेपछि…

रुपन्देही — आगामी प्रतिनिधिसभा निर्वाचनको संघारमा रुपन्देही क्षेत्र नम्बर ३ मा जनता समाजवादी पार्टी नेपाल (जसपा) का तर्फबाट उम्मेदवार बनेका श्रीनिवास यादवले आफ्नो उम्मेदवारी फिर्ता लिएका छन्।

यादवले विज्ञप्ति जारी गर्दै आफू नेपाल कम्युनिस्ट पार्टी (एमाले) मा प्रवेश गरेको घोषणा गरेका हुन्। उम्मेदवारी दर्ता गरिसकेको अवस्थामा उनले एकाएक निर्णय परिवर्तन गरेपछि क्षेत्रीय राजनीतिक वृत्तमा नयाँ चर्चा सुरु भएको छ।

यादवले आफ्नो निर्णयबारे स्पष्ट पार्दै देशमा राजनीतिक स्थायित्व, सुशासन र विकासका लागि नेकपा (एमाले) नै सबैभन्दा सक्षम तथा प्रमुख शक्ति बन्न सक्ने निष्कर्षमा पुगेको उल्लेख गरेका छन्। उनले राष्ट्रको समृद्धि र स्थिर सरकार गठनका लागि आफूले एमाले रोजेको बताएका छन्।

उनको उम्मेदवारी फिर्तासँगै रुपन्देही–३ को चुनावी समीकरणमा परिवर्तन आउने आकलन गरिएको छ। जसपाले अब सो क्षेत्रमा नयाँ उम्मेदवार अघि सार्ने वा रणनीति परिवर्तन गर्ने भन्ने विषयमा आधिकारिक धारणा सार्वजनिक गरिसकेको छैन।

निर्वाचनको मुखैमा भएको यस घटनालाई स्थानीय तहदेखि केन्द्रीय राजनीतिक वृत्तसम्म चासोका साथ हेरिएको छ।