कारागार सुरक्षाको जिम्मा नेपाली सेनालाई

दार्चुला — सदरमुकाम खलङ्गामा रहेको जिल्ला कारागार कार्यालयको सुरक्षा व्यवस्थापन अब नेपाली सेना ले सम्हालेको छ। बिहीबारदेखि कारागार सुरक्षाको जिम्मा नेपाली सेनाले लिएको हो।

सदरमुकाम खलङ्गामै रहेको श्रीदल गुल्म बाट सहसेनानी अन्वेश गुरुङको नेतृत्वमा १० जनाको टोली कारागार सुरक्षार्थ खटिएको छ। यसअघि उक्त कारागारको सुरक्षा नेपाल प्रहरी ले गर्दै आएको थियो। हाल प्रहरी टोली पनि कारागार सुरक्षामा खटिएकै छ।

सुरक्षाका दृष्टिले अति संवेदनशील मानिएका कारागार तथा महत्त्वपूर्ण आयोजनामा सेना परिचालन गर्ने मन्त्रिपरिषद्को निर्णयअनुसार जिल्लामा सेना तैनाथ गरिएको हो। प्रमुख जिल्ला अधिकारी अनिल पौडेलका अनुसार सरकारको निर्देशनबमोजिम आवश्यक समन्वय गरी सुरक्षा व्यवस्थापन सुदृढ बनाइएको छ।