जाजरकोटमा १९ क्विन्टल अवैध जडिबुटीसहित ट्रक र चालक पक्राउ

बारेकोटबाट नेपालगन्जतर्फ लैजाँदै गरेको अवस्थामा १९ क्विन्टल सिस्नोको जरा बरामद

जाजरकोट। जाजरकोटको बारेकोट गाउँपालिकाबाट अवैध रूपमा निकासी गर्न लागिएको जडिबुटीसहित प्रहरीले एक ट्रक र त्यसका चालकलाई नियन्त्रणमा लिएको छ। जिल्ला प्रहरी कार्यालय जाजरकोटका अनुसार बारेकोट-२, लिम्सा बजारस्थित सडक खण्डमा विशेष जाँचका क्रममा उक्त अवैध सामग्री बरामद गरिएको हो।

पक्राउ पर्नेमा सल्यान जिल्लाको शारदा नगरपालिका वडा नं. १२ निवासी २३ वर्षीय निमराज वि.क. सुनार रहेका छन्। घाँट बजारबाट नेपालगन्जतर्फ जाँदै गरेको भे १ ख ३७१३ नम्बरको ट्रकलाई रोकी चेकजाँच गर्दा ४६ वटा प्लाष्टिकका बोरामा प्याक गरिएको अन्दाजी १९ क्विन्टल ‘पहेंलो जडि’ (सिस्नोको जरा) फेला परेको प्रहरीले जनाएको छ।

बरामद गरिएको उक्त जडिबुटीको वन कार्यालयबाट जारी गरिने छुटपुर्जी लगायतका कुनै पनि आधिकारिक कागजात नभएको पाइएको छ। अवैध रूपमा ओसारपसार भइरहेको उक्त जडिबुटी, ट्रक र चालकलाई आवश्यक कानुनी कारबाहीका लागि डिभिजन वन कार्यालय जाजरकोटमा बुझाइएको सूचना अधिकारी प्रहरी निरीक्षक सुधिर कुमार खड्काले जानकारी दिनुभयो। थप अनुसन्धान भइरहेकाे प्रहरीले जनाएकाे छ ।