राजावादी प्रदर्शनका नाममा ५० लाख एसएमएस पठाएर आतङ्क फैलाउने व्यक्ति पक्राउ

काठमाडौं — एकै दिन करिब ५० लाख एसएमएस पठाएर सर्वसाधारणलाई आतङ्कित पारेको आरोपमा ३४ वर्षीय निर्देश सेढाईं पक्राउ परेका छन्। काठमाडौँ उपत्यका अपराध अनुसन्धान कार्यालयले मङ्गलबार काठमाडौँको हात्तीसारबाट सेढाईंलाई पक्राउ गरेको हो।

प्रहरीका अनुसार सेढाईंले सोमबार एटी अलर्टको बल्क एसएमएस प्रणालीको दुरुपयोग गर्दै पुस ३० गते दिउँसो १२ बजे राजावादी प्रदर्शनमा सहभागी हुन आह्वान गर्दै ठूलो संख्यामा एसएमएस पठाएका थिए। एकैचोटि लाखौँ मोबाइल नम्बरमा सन्देश पुग्दा नागरिकहरू त्रसित बनेका थिए।

उक्त घटनाले व्यक्तिगत गोपनीयताको हनन भएको भन्दै सामाजिक सञ्जालमा तीव्र आलोचना भएको थियो। प्रहरीले प्रारम्भिक अनुसन्धानका क्रममा सेढाईं वेदव्यास इन्टरप्राइजेज नामक कम्पनी सञ्चालन गर्दै आएको र सोही कम्पनीको नामबाट विभिन्न एसएमएस सेवा प्रदायकसँग सेवा लिएर बल्क म्यासेज पठाएको पत्ता लागेको जनाएको छ।

सेढाईंले एकै दिन लाखौँ एसएमएस पठाउन करिब एक करोड रुपैयाँ खर्च भएको दाबी गरेका छन्। घटनाबारे थप अनुसन्धान भइरहेको र कानुनी प्रक्रिया अघि बढाइएको प्रहरीले जनाएको छ।

प्रहरीले यस्ता गतिविधिले समाजमा भ्रम र डर फैलाउने भएकाले बल्क एसएमएस प्रणालीको दुरुपयोग नगर्न सबैलाई सचेत रहन आग्रह गरेको छ।