जापानी प्रधानमन्त्री ताकाइची मध्यावधि निर्वाचनको तयारीमा

टोकियो। जापानकी प्रधानमन्त्री साने ताकाइचीले सरकारप्रति जनसमर्थन बलियो बनाउने उद्देश्यसहित आगामी साताहरूमा मध्यावधि आम निर्वाचन गराउने तयारी गरिरहेको जापानी सञ्चारमाध्यमहरूले जनाएका छन्।

गत अक्टोबरमा जापानको पहिलो महिला प्रधानमन्त्री बनेकी ताकाइचीको मन्त्रिपरिषद्ले हाल करिब ७० प्रतिशत जनअनुमोदन पाएको छ। तर सत्तारूढ समूहसँग संसद्को तल्लो सदनमा झिनो बहुमत मात्र रहेकाले आफ्ना महत्वाकाङ्क्षी नीति तथा एजेन्डा कार्यान्वयनमा कठिनाइ भइरहेको बताइएको छ।

योमिउरी र माइनिची दैनिकले नाम नखुलाइएका सरकारी स्रोतलाई उद्धृत गर्दै प्रधानमन्त्री ताकाइचीले जनवरी २३ मा संसद् सत्र सुरु भएसँगै तल्लो सदन विघटन गर्ने विकल्पमा विचार गरिरहेको उल्लेख गरेका छन्। यसो भए निर्वाचन फेब्रुअरीको सुरुदेखि मध्यसम्म हुन सक्ने सम्भावना रहेको छ।

माइनिचीका अनुसार ताकाइची प्रशासनभित्र “समर्थन दर उच्च रहेको बेला संसद् विघटन गरी आफ्नो राजनीतिक आधार बलियो बनाउनु उपयुक्त हुन्छ” भन्ने धारणा बलियो बन्दै गएको छ। सुरुवातमा अल्पमत सरकारको नेतृत्व गर्दै प्रधानमन्त्री बनेकी ताकाइचीको लिबरल डेमोक्र्याटिक पार्टी (एलडीपी) र गठबन्धन साझेदार जापान इनोभेसन पार्टीले नोभेम्बरमा केही सांसद एलडीपीमा सामेल भएपछि तल्लो सदनमा बहुमत पुनः प्राप्त गरेका थिए। यद्यपि माथिल्लो सदनमा भने सत्तारूढ समूह अझै अल्पमतमै छ।

योमिउरीका अनुसार सम्भावित भारी बहुमतले ताकाइचीलाई ‘सक्रिय’ वित्तीय खर्च, बलियो खुफिया क्षमता विस्तार र राष्ट्रिय सुरक्षा एजेन्डा अघि बढाउन सहयोग पुर्‍याउनेछ। साथै यसले चीनसँगको चिसिएको सम्बन्धमा पनि गतिरोध तोड्न मद्दत पुग्न सक्ने विश्लेषण गरिएको छ।

प्रधानमन्त्री ताकाइचीले नोभेम्बरमा चीनले ताइवानमाथि आक्रमण गरे जापानले सैन्य हस्तक्षेप गर्न सक्ने अभिव्यक्ति दिएपछि दुई देशबीचको सम्बन्ध थप तनावग्रस्त बनेको थियो। त्यसपछि बेइजिङले जापानमा निर्यात हुने दोहोरो प्रयोगका सामग्री तथा दुर्लभ खनिजमा कडाइ गरेको छ।

यद्यपि गत महिना ताकाइचीले चीनसँग वार्ताका लागि जापान सधैं खुला रहेको भन्दै सम्बन्ध सुधारको संकेत दिएकी थिइन्।