सुर्खेतमा कोइला बाली सुतेका एकै परिवारका चारमध्ये शिशुकाे मृत्यु, तीन जना उपचाररत

सुर्खेत । सुर्खेतको वीरेन्द्रनगर नगरपालिका–१२, बिरुवाबारीमा कोइला बाली सुतेकाे अवस्थामा ३८ दिनकाे शिशुकाे मृत्यु भएकाे छ भने अन्य ३ जना बेहाेस भएका छन ।

प्रहरीका अनुसार सुर्खेत भेरीगंगा नगरपालिका–२ घर भई हाल बीरेन्द्रनगर–१२ स्थित मानबहादुर चन्दको घरमा कोठा भाडामा बस्दै आएका करिब ३०/३२ वर्षीया तारा बुढा, उनकी भदैनी करिब १२/१३ वर्षीया संगम बुढा, छोरा १० वर्षका प्रकाश बुढा र ३८ दिनकी छोरी प्रतिक्षा बुढा कोठाभित्र कोइला बाली सुतेका थिए।

आज बिहान करिब ९ः४५ बजेसम्म कोठाबाट ननिस्किएपछि घरबेटीले बोलाउँदा छोरा प्रकाश बुढाले ढोका खोलेका थिए।

ढोका खोल्दा तारा बुढा र संगम बुढा बेहोस अवस्थामा फेला परेका थिए भने प्रकाश बुढा सामान्य अवस्थामा थिए। ३८ दिनकी शिशु प्रतिक्षा बुढाको भने घटनास्थलमै मृत्यु भइसकेको प्रहरीले जनाएको छ।

बेहोस भएका तारा बुढा, संगम बुढा र प्रकाश बुढालाई उपचारका लागि प्रदेश अस्पताल कालागाउँ, सुर्खेत लगिएको छ। उपचारमा तारा बुढाका श्रीमान गोपी बुढा रहेको जनाइएको छ।

प्रहरी टोली घटनास्थलमा प्रारम्भिक अनुसन्धान कार्य सम्पन्न गरी मृत शिशुको शव पोष्टमार्टमका लागि प्रदेश अस्पताल पठाइएको छ।

घटनाबारे थप अनुसन्धान भइरहेको प्रहरीले जनाएको छ।