स्वास्थ्यका लागि फर्सी खानुका फाइदै फाइदा

काठमाडौं । हाम्रो भान्सामा प्रयोग हुने धेरैजसो खाद्यवस्तुमा औषधीय गुण लुकेका हुन्छन् । तीमध्ये फर्सी एक यस्तो तरकारी हो, जसको नियमित सेवनले शरीरलाई स्वस्थ र तन्दुरुस्त राख्न महत्वपूर्ण भूमिका खेल्छ । तरकारीका रूपमा मात्र नभई फर्सीको बियाँ र मुन्टा पनि पोषणका हिसाबले अत्यन्तै उपयोगी मानिन्छन् ।

बच्चादेखि वृद्धसम्म सबैले रुचाउने फर्सीमा प्रशस्त मात्रामा भिटामिन ‘ए’, फलाम, फाइबरलगायत आवश्यक खनिज तथा पोषक तत्व पाइन्छन् । यसको सेवनले पाचन प्रणाली सुधार गर्नुका साथै रोग प्रतिरोधात्मक क्षमता बढाउन मद्दत गर्छ ।

फर्सीको मुन्टा भिटामिन ‘ई’, ‘सी’, ‘ए’, ‘बी–६’, पोटासियम, फोलिक एसिड, क्याल्सियम, कपर, प्रोटिन, म्याग्नेसियम, आइरन, फाइबर र फस्फोरसको राम्रो स्रोत हो । यी सबै तत्व मानव स्वास्थ्यका लागि अत्यावश्यक मानिन्छन् ।

युएसडिए (USDA) नेसनल न्युट्रिएन्टको अध्ययनअनुसार फर्सीको पातमा रहेका गुणहरूले उच्च रक्तचाप, कोलेस्ट्रोल र क्यान्सरजस्ता गम्भीर रोगको जोखिम कम गर्न मद्दत गर्छन् । नियमित रूपमा फर्सीको साग सेवन गर्ने व्यक्तिहरू यस्ता रोगबाट सुरक्षित रहन सक्ने विज्ञहरूको भनाइ छ । २५० ग्राम फर्सीमा करिब ४९ क्यालोरी मात्र पाइने भएकाले यो तौल नियन्त्रण गर्न चाहनेका लागि पनि उपयुक्त मानिन्छ । फर्सीमा कार्बोहाइड्रेट कम हुने भएकाले शरीरमा रहेको खराब कोलेस्ट्रोल घटाउन समेत सहयोग पुग्छ ।

विज्ञहरूका अनुसार पहेंलो भएर पाकेको फर्सी झन् बढी लाभदायक हुन्छ । यसमा पाइने बेटा क्यारोटिन र एन्टिअक्सिडेन्टले क्यान्सरको सम्भावना कम गर्नुका साथै मुटुसम्बन्धी रोगबाट जोगाउन मद्दत गर्छ ।

फर्सीको बियाँ पनि उत्तिकै गुणकारी हुन्छ । बियाँमा प्रोटिन, भिटामिन र फ्याटी एसिड प्रशस्त मात्रामा पाइन्छ । साथै म्याग्नेसियम, पोटासियम र जिंकले स्मरणशक्ति बढाउन, हाडलाई बलियो बनाउन र समग्र स्वास्थ्य सुधार गर्न सहयोग पुर्‍याउँछ । विभिन्न अध्ययनअनुसार फर्सीले कार्डियोभास्कुलर रोगको जोखिम घटाउने र तनाव कम गर्न समेत मद्दत गर्ने देखिएको छ ।

यसकारण, दैनिक आहारमा फर्सी, यसको साग र बियाँ समावेश गर्नु स्वास्थ्यका लागि अत्यन्त लाभदायक हुने विज्ञहरूको सुझाव छ ।