एनपीएल : आज जनकपुर–विराटनगर र कर्णाली–सुदूरपश्चिम भिड्ने

काठमाण्डौ, मंसिर ८ — नेपाल प्रिमियर लिग (एनपीएल) क्रिकेटअन्तर्गत आज सोमबार दुई खेलहरू हुँदैछन्। पहिलो खेल बिहान ११:४५ बजे जनकपुर बोल्ट्स र विराटनगर किंग्सबीच हुनेछ भने दोस्रो खेल दिउँसो ४ बजे कर्णाली याक्स र सुदूरपश्चिम रोयल्स भिड्नेछन्।

यस सिजनमा पहिलोपटक एक–आपसमा भिड्न लागेका चारै टोलीले आज अंकतालिकामा महत्वपूर्ण उछाल ल्याउने लक्ष्य राखेका छन्।
उद्घाटन खेलमा काठमाण्डु गोर्खाजसँग पराजित भएको जनकपुरका लागि आजको खेल सिजनको दोस्रो अवसर हो। पछिल्ला दुवै खेलमा काठमाण्डु र पोखरालाई पराजित गर्दै उत्कृष्ट लयमा रहेको विराटनगर किंग्स भने जीतको ह्याट्रिक बनाउन मैदान उत्रिँदैछ।

दोस्रो खेलमा कर्णाली याक्सले अहिलेसम्मका दुई खेलमध्ये एकमा विजय हात पारेको छ। अर्को तर्फ, लगातार जितको लक्ष्यमा रहेको सुदूरपश्चिम रोयल्सले आज तेस्रो विजय दर्ता गर्दै तालिकामा मजबुत उपस्थितिका लागि प्रयत्न गर्नेछ। यसअघि सुदूरपश्चिमले काठमाण्डु र पोखरालाई पराजित गरिसकेको छ भने कर्णालीले लुम्बिनीलाई हराउँदै आत्मविश्वास बढाएको छ।