किवीकाे सेवनले यस्ता छन बहुमूल्य फाइदाहरू

हरियो रङको सानो आकारको कीवी फल स्वास्थ्यका लागि अत्यन्त लाभदायी मानिन्छ । भिटामिन बी, सी, एन्टिअक्सिडेन्ट, फस्फोरस, पोटासियम र क्याल्सियमजस्ता पौष्टिक तत्वले भरिपूर्ण कीवीलाई स्वास्थ्यविद्हरूले ‘पोषक तत्वको पावरहाउस’ भनेर उल्लेख गर्छन् । नियमित रूपमा कीवी सेवन गर्दा शरीरलाई विभिन्न रोगबाट जोगाउन मद्दत पुग्ने अनुसन्धानहरूले देखाएका छन् ।

डीएनएको मर्मतमा मद्दत
तनाव, धूम्रपान, क्यान्सर, किमोथेरेपी, रेडिएशन, औषधिको अत्यधिक प्रयोग र प्रदूषणको असर हाम्रो डीएनएमा पर्ने गर्छ । यसले मृगौला, फोक्सो र दिमागसँग सम्बन्धित गम्भीर रोगहरू निम्त्याउन सक्छ । तर, किवीमा पाइने एन्टिअक्सिडेन्ट र अन्य जैविक तत्वहरूले डीएनएको मर्मत गर्न सहयोग गर्छन् । विभिन्न अध्ययनका अनुसार किवीको नियमित सेवनले पेटको क्यान्सरको जोखिम पनि कम गर्न सक्छ ।

प्रतिरोधात्मक क्षमता बलियो बनाउँछ
कीवीमा प्रशस्त मात्रामा भिटामिन सी र एन्टिअक्सिडेन्ट हुन्छन्, जसले शरीरको रोग प्रतिरोधात्मक क्षमता बढाउँछ । चिकित्सकहरूका अनुसार किवी प्राकृतिक ‘इम्युनिटी बूस्टर’ हो, जसले रुघाखोकी, संक्रमण र अन्य रोगबाट शरीरलाई जोगाउँछ ।

रक्तचाप नियन्त्रणमा सहयोगी
सन् २०१४ मा गरिएको एक अध्ययन अनुसार दैनिक दुईदेखि तीनवटा कीवी सेवन गर्ने व्यक्तिहरूमा रक्तचाप घट्ने देखिएको छ । लामो समयसम्म किवी सेवन गर्दा उच्च रक्तचाप, स्ट्रोक, हृदयघात र मुटु सम्बन्धी रोगहरूको जोखिम घट्छ ।

रगत जम्न दिँदैन
किवीमा पाइने प्राकृतिक तत्वहरूले रगत जम्न नदिने क्षमता राख्छन् । यसले रक्तसञ्चारलाई सहज बनाउँछ र शरीरमा बोसोको मात्रा कम गर्न मद्दत गर्छ ।

घाउ छिटो निको पार्ने गुण
यदि घाउ लागेको छ वा शल्यक्रिया भएको छ भने किवी खानु लाभदायी हुन्छ । यसमा पाइने एन्टिब्याक्टेरियल र एन्टिइन्फ्लेमेटरी गुणहरूले घाउ छिटो सुकाउन र शरीरलाई छिटो निको पार्न सहयोग गर्छन् ।

स्वास्थ्यविद्हरूका अनुसार, प्राकृतिक एन्टिअक्सिडेन्ट र पोषक तत्वले भरिपूर्ण कीवीलाई दैनिक आहारमा समावेश गर्नाले शरीरलाई स्वस्थ र ऊर्जावान राख्न सकिन्छ ।

कीवी केवल स्वादिलो फल मात्र होइन, यो शरीरका अंगहरूलाई स्वस्थ राख्ने प्राकृतिक औषधि हो । नियमित रूपमा २–३ वटा किवी सेवन गर्नाले प्रतिरोधात्मक शक्ति बढ्छ, रक्तचाप सन्तुलनमा रहन्छ र शरीरलाई रोगबाट टाढा राख्न मद्दत गर्छ ।