साहारा स्कुलमा अक्षर सुधार तालिम सम्पन्न

गुर्भाकोट। “सुरक्षित लेखाइ, सुनिश्चित भविष्य” भन्ने नाराका साथ सुर्खेतको गुर्भाकोट-९ मा अवस्थित साहारा ईङ्ग्लिस मिडियम स्कुलले आयोजना गरेको छ दिने ‘अक्षर सुधार तालिम’ आज एक विशेष कार्यक्रमका बीच  सम्पन्न भएको छ। ग्लोबल स्किल डेभलपमेन्ट नेपालको प्राविधिक सहकार्यमा सञ्चालित उक्त तालिममा विद्यार्थी र शिक्षकहरूको उत्साहजनक सहभागिता रहेको थियो।

२०८२ साल साउन ११ गतेदेखि १६ गतेसम्म सञ्चालन भएको तालिममा विद्यालयका कक्षा २ देखि १० सम्मका विद्यार्थी तथा शिक्षकहरूले सक्रिय रूपमा सहभागी भई शुद्ध र सुन्दर लेखाइका विभिन्न सीपहरू सिकेका थिए। शिक्षक र विद्यार्थीहरूले एउटै मञ्चमा बसेर लेखाइ अभ्यास गर्नु तालिमको मुख्य आकर्षण रह्यो, जसले सिकाइ प्रक्रियालाई थप प्रभावकारी बनाएको थियो।

तालिम समापन समारोहमा उत्कृष्ट प्रदर्शन गर्ने हरेक कक्षाका विद्यार्थीहरूलाई ‘ह्यान्डराइटिङ स्टार’ उपाधिबाट सम्मान गरिएको थियो। यसैगरी, तालिमलाई प्रभावकारी बनाउन महत्त्वपूर्ण भूमिका निर्वाह गर्ने मुख्य प्रशिक्षक श्री गोपाल विश्वकर्मा लगायत सम्पूर्ण प्रशिक्षकहरूलाई ‘डेडिकेटेड ट्रेनर रिकग्निसन’ प्रमाणपत्र प्रदान गरी कदर गरिएको थियो।

कार्यक्रमका मुख्य प्रशिक्षक तथा ग्लोबल स्किल डेभलपमेन्ट नेपालका हेड ट्रेनर श्री गोपाल विश्वकर्माले अक्षर केवल लेखाइ मात्र नभएर व्यक्तिको अनुशासन, एकाग्रता र व्यक्तित्वको प्रतिबिम्ब भएको बताउनुभयो। उहाँले भन्नुभयो, “सफा अक्षरले सफा सोच बनाउँछ, र सफा सोचले सफल जीवनको आधार तयार गर्छ।”

यस अवसरमा तालिमबाट सिकेको सीपलाई निरन्तरता दिन र विद्यार्थीहरूलाई प्रोत्साहन गर्न विद्यालयमा एक ‘ह्यान्डराइटिङ क्लब’ समेत गठन गरिएको घोषणा गरियो। यस क्लबमार्फत नियमित रूपमा लेखाइ अभ्यास तथा सम्बन्धित गतिविधिहरू सञ्चालन गरिने विद्यालयले जनाएको छ।

साहारा ईङ्ग्लिस मिडियम स्कुलले आफ्ना विद्यार्थीहरूलाई केवल पाठ्यपुस्तकको ज्ञानमा मात्र सीमित नराखी जीवनपयोगी सीप, व्यवहार र संस्कारमा समृद्ध बनाउने शैक्षिक लक्ष्य राखेको छ। यो तालिम सोही बृहत् शैक्षिक गन्तव्यको एक महत्त्वपूर्ण हिस्सा रहेको विद्यालय व्यवस्थापनले बताएको छ।