- साउन ५, २०८२
- No Comment
- 56
आजकाे मौसम : यी चार प्रदेशमा भारी वर्षाको सम्भावना

साउन ५ – सोमबार (आज) देशभरको मौसम बदली रहने र विभिन्न स्थानमा वर्षा हुने क्रम जारी रहने मौसम पूर्वानुमान महाशाखाले जनाएको छ। बिहान ६ बजे जारी गरिएको बुलेटिनअनुसार विशेष गरी देशका पहाडी र हिमाली भूभागमा वर्षा र हिमपातको सम्भावना छ भने चार प्रदेशका केही स्थानमा भारी वर्षा पनि हुन सक्ने चेतावनी दिइएको छ।
लुम्बिनी, कर्णाली र सुदूरपश्चिम प्रदेशसहित देशका पहाडी क्षेत्रका केही स्थानमा तथा बाँकी भू-भागका थोरै स्थानमा मेघगर्जन र चट्याङसहित हल्कादेखि मध्यम वर्षा हुनसक्नेछ। बागमती, गण्डकी, लुम्बिनी र सुदूरपश्चिम प्रदेशका एक-दुई स्थानमा भारी वर्षाको सम्भावना पनि रहेको छ। यससँगै उच्च पहाडी तथा हिमाली क्षेत्रका केही स्थानमा हल्कादेखि मध्यम वर्षा वा हिमपातको सम्भावना रहेको महाशाखाले जनाएको छ।
कोसी, मधेस, बागमती, गण्डकी र लुम्बिनी प्रदेशसहित देशका पहाडी भागमा पनि राति हल्कादेखि मध्यम वर्षा सम्भावित छ। गण्डकी प्रदेशका एक-दुई स्थानमा भारी वर्षा हुने सम्भावना रहेको महाशाखाको बुलेटिनमा उल्लेख छ। साथै, देशका उच्च पहाडी र हिमाली क्षेत्रका केही स्थानमा राति पनि वर्षा वा हिमपात हुन सक्नेछ।
मौसम महाशाखाले लगातारको वर्षाले नदी, नाला तथा खोलामा पानीको बहाव बढ्न सक्ने, पहिरो र सडक अबरुद्ध हुन सक्ने भन्दै सतर्कता अपनाउन आग्रह गरेको छ। विशेषगरी पहाडी भूभाग र नदी किनारमा बसोबास गर्नेहरुलाई आवश्यक सतर्कता अपनाउन सुझाव दिइएको छ।