सुर्खेतको कोपिला भ्याली स्कूल विश्वकै उत्कृष्ट १० मा छनोट 

वीरेन्द्रनगर  ।  कर्णाली प्रदेशको सुर्खेतस्थित कोपिला भ्याली स्कूलले प्रतिष्ठित ‘विश्वकै उत्कृष्ट विद्यालय पुरस्कार २०२५’ (World’s Best School Prizes 2025) अन्तर्गत ‘वातावरणीय कार्य’ (Environmental Action) श्रेणीमा शीर्ष १० मा स्थान सुरक्षित गर्दै नेपालका लागि ऐतिहासिक गौरव हासिल गरेको छ।

यो उपलब्धिले विद्यालयलाई विश्वव्यापी मञ्चमा चिनाएको मात्र छैन, नेपालको शिक्षा क्षेत्रको शिर पनि उच्च बनाएको छ। सन् २०२२ देखि विश्वव्यापी रूपमा शिक्षामा नवीन र दिगो प्रयास गर्ने विद्यालयहरूलाई सम्मान गर्न सुरु गरिएको यस पुरस्कारको अन्तिम १० मा नेपालबाट कुनै विद्यालय छानिएको यो पहिलोपटक हो।

यो पुरस्कार विभिन्न पाँच विधामा प्रदान गरिन्छ: वातावरणीय कार्य, समुदाय सहकार्य, नवप्रवर्तन, चुनौती पार गर्ने क्षमता, र स्वस्थ जीवनशैली।

विजेताको छनोट विज्ञ निर्णायक मण्डलले गर्नेछ भने हालै सार्वजनिक अनलाइन भोटिङ पनि खुला गरिएको छ, जसले विश्वभरका समर्थकहरूलाई आफ्नो मनपर्ने विद्यालयलाई मत दिने अवसर प्रदान गर्दछ।

पुरस्कारका अन्तिम विजेताहरूको घोषणा सन् २०२५ को अक्टोबरमा गरिनेछ। यसअघि, शीर्ष ५० मा पर्ने सबै विद्यालयहरूलाई नोभेम्बर १५-१६ मा संयुक्त अरब इमिरेट्स (यूएई) को अबुधाबीमा आयोजना हुने ग्लोबल नीति संवाद कार्यक्रममा आफ्ना अनुभव र सफलताका कथाहरू साट्न आमन्त्रण गरिनेछ।

कोपिला भ्याली स्कूलको यो सफलता विपन्न बालबालिकालाई गुणस्तरीय शिक्षा प्रदान गर्ने मात्र नभई, वातावरणीय दिगोपनालाई शिक्षा प्रणालीमा कसरी एकीकृत गर्न सकिन्छ भन्ने कुराको उत्कृष्ट उदाहरण हो। यो उपलब्धि कोपिला भ्याली स्कूलका लागि मात्र नभएर सम्पूर्ण नेपाली शिक्षा क्षेत्रका लागि प्रेरणाको स्रोत र गर्वको विषय बनेको छ।