रौतहटमा स्कारपियो दुर्घटनाः ८ जनाको मृत्यु, ५ जना घाइते

रौतहटमा स्कारपियो गाडी दुर्घटना हुँदा आठ जनाको मृत्यु भएको छ भने पाँच जना घाइते भएका छन् ।

पूर्व+पश्चिम राजमार्गअन्तर्गत चन्द्रपुर नगरपालिका-४ धन्सार पुल नजिकैको जंगलमा निजगढबाट चपुरतर्फ आउँदै गरेको बा १६ च ३१६२ नं.को स्कारपियो अनियन्त्रित हुदा दुर्घटना भएको हो ।
जिल्ला प्रहरी कार्यालय रौतहटका अनुसार मृत्यु हुनेहरूमा सिरहाको अर्नमा गाउँपालिका-३ बंठियाटोलका ६० वर्षीया लरुवतीदेवी महरा सोही ठाउँकी ३० वर्षीया उर्मिला महरा, ५० वर्षीया रामकुमारी महरा, ५५ वर्षीया महगींदेवी महरा, ६२ वर्षीया फुलमन्तिदेवी चमार, ६० वर्षीया रामकुमारीदेवी महरा, ३० वर्षीया सकुन्तलादेवी महरा र सोही गाउँपालिका-५ बलुवाटोलका ४० वर्षीय स्कारपियो चालक श्रीकुमार यादव रहेका छन् ।

दुर्घटनामा अर्नमा-३ की ३० वर्षीया राधा राम, सोही ठाउँका उमेश रामका २ वर्षीय छोरा आर्यन, २५ वर्षीया देवकुमारी महरा, उनका ७ वर्षीय छोरा रितिक महरा र अर्नमा-३ कै ६० वर्षीया कन्यादेवी महरा घाइते भएको प्रहरीले जनाएको छ ।

प्रहरीका अनुसार उनीहरूको  अहिले हाइवे ट्रम्मा सेन्टर अस्पताल र वीरगञ्जको बयोधा अस्पतालमा उपचार भइरहेको र मृत्यु भएकाहरूको पोस्टमार्टमको लागि चन्द्रनिगाहपुर अस्पतालमा राखिएको  छ । घटना सम्बन्धी थप अनुसन्धान भइरहेको जनाएको छ ।