सुर्खेतमा ब्राउनसुगरसहित दुई भारतीय नागरिक पक्राउ

जिल्ला प्रहरी कार्यालय सुर्खेत र लागुऔषध नियन्त्रण शाखा कार्यालय सुर्खेतबाट खटिएको संयुक्त प्रहरी टोलीले वीरेन्द्रनगर–३ गण्डकी लाइन क्षेत्रमा लागुऔषध कारोबार भइरहेको भन्ने गोप्य सूचनाका आधारमा उनीहरूलाई नियन्त्रणमा लिएको हो।

पक्राउ पर्नेमा भारतको उत्तर प्रदेश श्रावस्ती निवासी २३ वर्षीय त्रिपुरारी लाल र उत्तर प्रदेशको वहराईच नानपारा निवासी ५६ वर्षीय दिलिप कुमार सिंह रहेका छन्। उनीहरू हाल वीरेन्द्रनगर–३ मा कोठा भाडामा बस्दै आएका थिए।

प्रहरीले शंकास्पद अवस्थामा फेला परेका उनीहरूको शरीर तथा डेराकोठा खानतलासी गर्दा ७ ग्राम ९५० मिलिग्राम ब्राउनसुगर बरामद गरेको जनाएको छ।

जिल्ला प्रहरी कार्यालय सुर्खेतका प्रवक्ता तथा सूचना अधिकारी डिएसपी कविन्द्र सिंह बोहराका अनुसार पक्राउ परेका दुवै जनालाई नियन्त्रणमा राखी लागुऔषध सम्बन्धी कसुरमा थप अनुसन्धान भइरहेको छ।