दुई थान घरेलु पेस्तोलसहित नेपाली युवक भारतमा पक्राउ

काठमाडौँ — नेपाल–भारत सीमावर्ती क्षेत्रमा दुई थान घरेलु पेस्तोलसहित एक नेपाली युवक भारतमा पक्राउ परेका छन्। सशस्त्र सीमा बल (एसएसबी) ४१औँ वाहिनी अन्तर्गत कादोमनीजोत ई कम्पनीका जवानहरूले उनलाई नियन्त्रणमा लिएका हुन्।

पक्राउ पर्नेमा झापाको मेचीनगर नगरपालिका–७, कालीखोला काँकडभिट्टाका ३१ वर्षीय नवीन थापा मगर रहेका छन्। भारतीय सञ्चारमाध्यमका अनुसार उनलाई सोमबार गोप्य सूचनाको आधारमा भारतको भालुगाडा क्षेत्रमा पक्राउ गरिएको हो।

एसएसबीले शंकास्पद अवस्थामा रहेका मगरमाथि जाँच गर्दा उनको साथबाट दुई थान घरेलु पेस्तोल, एक थान म्यागजिन र ४ सय भारतीय रुपैयाँ बरामद भएको जनाएको छ।

प्रारम्भिक अनुसन्धानका क्रममा मगरले पैसाको प्रलोभनमा परी बिहार राज्यको किशनगञ्ज जिल्लास्थित गलगलियाबाट पानीटंकीसम्म अवैध हतियार ओसारपसार गर्ने गरेको खुलेको भारतीय सुरक्षा अधिकारीहरूले बताएका छन्।

एसएसबीले आवश्यक कानुनी प्रक्रिया पूरा गरेपछि बरामद हतियारसहित मगरलाई थप अनुसन्धान तथा कारबाहीका लागि खोरीबाडी थाना प्रहरीको जिम्मा लगाएको छ। भारतीय प्रहरीले उनीविरुद्ध आम्र्स एक्ट अन्तर्गत मुद्दा दर्ता गरेको जनाएको छ। उनलाई आज सिलिगुडी जिल्ला अदालतमा उपस्थित गराइने बताइएको छ।